Azərbaycanın elmi və təhsil ictimaiyyətinə ağır itki üz vermişdir

Respublikamızın tanınmış riyaziyyat alimi, ADPU-nun “Cəbr və həndəsə” kafedrasının müdiri, Azərbaycan Milli Elmlər Akademiyasının Riyaziyyat və Mexanika İnstitutunun “Cəbr və riyazi məntiq” şöbəsinin aparıcı elmi işcisi,  riyziyyat üzrə fəlsəfə doktoru, dosent  Şahbazov Aydın İsrafil oğlu 2020-ci il iyulun 8-də ömrünün 67-ci ilində ürək çatışmazlığından qəflətən vəfat etmişdir.

Şahbazov Aydın 5 may 1953-cü ildə Cəlilabad rayonunun Pokrovka kəndində anadan olub.

1970-ci ildə Cəlilabad şəhər 1 nömrəli orta məktəbini, 1977-ci ildə isə M.V.Lomonosov adına Moskva Dövlət Universitetinin Mexanika-riyaziyyat fakültəsini bitirmişdir.

1978-1980-ci illərdə  M.V.Lomonosov adına Moskva Dövlət Universitetinin Mexanika-riyaziyyat fakültəsinin riyaziyyat bölməsində elmi-tətqiqat üzrə stajor, 1980-1984-cü illərdə həmin bölmədə aspirant olmuş, 1984-çü ildə professor E.A.Qorinin  rəhbərliyi altında “Спектр компактных операторов взвешенной композиции в некоторых пространствах аналитических функций” mövzusunda namizədlik dissertasiyası müdafiə etmişdir.

Azərbaycan, İspaniya, Fransa, Rusiya, Türkiyə, Estoniya, Qazaxıstan, İran, Gürcüstan və s. ölkələrdə analiz və cəbr üzrə keçirilmiş  30-dan çox beynəlxalq seminar, simpozium və konfranslarda iştirak etmişdir.

1980-cı ildən başlayaraq  80-dən çox çap olunmuş elmi məqalənin (o cümlədən 30-dan çoxu ölkədən kənar nüfuzlu xarici elmi jurnallarda çap olunmuşdur) müəllifidir.

Əsas elmi nailiyyətləri Banax cəbrlərində, xüsusi halda, müntəzəm cəbrlərdə çəkili endomorfizmlərin kompaktlığının, ümumi halda isə kəsilməz funksiyalar cəbrinin qapalı altfəzalarında çəkili kompozisiya operatorların kompaktlığının, nüvəliliyinin, obrazının qapalılığının, spektrlərinin öyrənilməsidir. Bundan əlavə çəkili kompozisiya operatorların sonlu cəmlərinin kompaktlığı, spektral xassələri öyrənilmiş və bu nəticələr  operatorların kompakt həyacanlanmalarının spektrlərinin araşdırılmasına tətbiq edilmişdir. Eləcə də, disk cəbrləri üzərində modullarda  holomorf vektorial meydanların yaratdığı çəkili tip inteqral operatorların (çəkili tip endomorfizmlərin) kompaktlıq, nüvəlilik xassələri, spektri və digər spektral xassələri araşdırılmışdır. 4 nəfər riyaziyyat üzrə fəlsəfə doktoru (Ph.D) hazırlamışdır.

90-cı illərin ikinci yarısında Azərbaycan Milli Elmlər Akademiyasının Riyaziyyat və Mexanika İnstitutu tərəfindən  İran İslam Respublikasının Təbriz Universitetinə ezam olunmuş, 2000-ci illərin əvvəllərinə qədər bu  universitetdə professor vəzifəsində çalışmışdır. Aydın müəllimin bu ölkədə yetişdirdiyi kadrlar hal-hazırda İran İslam Respublikasını görkəmli kadrları sayılır.

Görkəmli alim, tanınmış pedaqoq və səmimi insan Şahbazov Aydın İsrafil oğlunun xatirəsi onu tanıyanların qəlbində daim yaşayacaqdır.

Allah rəhmət  eləsin!

© Bütün hüquqlar qorunur. Xəbərlərdən istifadə edərkən www.imm.az saytına istinad zəruridir.

ELAN

AMEA Riyaziyyat və Mexanika İnstitutunda 2O2O-ci ilin iyun-iyul aylarında keçiriləcək imtahan sessiyasında ixtisas və  xarici dil fənlərindən fəlsəfə doktoru hazırlığı üzrə doktorluq imtahanlarında iştirak etmək istəyən doktorant və dissertantlar 2O2O-ci il iyunun 11-dək RMİ-nin Təhsil şöbəsinə yaxınlaşmasını xahiş edirik (5 mərtəbə, 505 otaq).

© Bütün hüquqlar qorunur. Xəbərlərdən istifadə edərkən www.imm.az saytına istinad zəruridir.

S ə r ə n c a m

Akademik Ramiz Mehdiyev xüsusi karantinrejiminin uzadılması ilə əlaqədar AMEA əməkdaşlarının işədavamiyyətinin tənzimlənməsi haqqında sərəncam imzalayıb.

Sərəncamda bildirilir:

Azərbaycan Respublikası Nazirlər Kabinetinin “Azərbaycan Respublikasının ərazisində xüsusi karantin rejiminin müddətinin uzadılması və həmin rejimlə əlaqədar tətbiq edilən bəzi məhdudiyyətlərin aradan qaldırılması barədə” 1 may 2020-ci il tarixli 163 nömrəli qərarına əsasən, ölkə ərazisində xüsusi karantin rejimi 2020-ci il 31 may saat 00:00-dək uzadılmışdır.
Xüsusi karantin rejimi ilə əlaqədar Azərbaycan Respublikasının Nazirlər Kabineti və Azərbaycan Respublikasının Nazirlər Kabineti yanında Operativ Qərargah tərəfindən daha əvvəl müəyyən edilmiş bütün məhdudiyyətlər, tələblər və rejimlər həmin müddət ərzində qüvvədə saxlanılmışdır. Eyni zamanda bəzi məhdudiyyətlərin 4 may 2020-ci il tarixindən yumşaldılmasına dair qərar qəbul edilmiş və Azərbaycan Respublikasının Baş nazirinin 2 may 2020-ci il tarixli 10/541 nömrəli məktubuna əsasən dövlət qurumlarının rəhbərlərinə müvafiq tapşırıq verilmişdir. Bunları nəzərə alaraq, AMEA-nın bütün elmi müəssisə, təşkilat və xidmətlərinin rəhbərlərinin nəzərinə çatdırılır:

Karantin rejimi müddətində işçilərin onların ümumi sayının 30 faizindən çox olmamaq şərti ilə işə cəlb edilməsinə və zəruri hallarda növbəliliyin tətbiq
edilməsinə icazə verilir;

İşə cəlb edilmiş və edilməmiş işçilərin pandemiya və karantin şəraitininqaydalarına ciddi riayət etmələri təmin edilsin;

İşə cəlb edilən işcilər xidməti vəsiqə və digər zəruri sənədlərlə təmin edilsinlər;

Xidməti vəsiqələrdən sui-istifadə hallarına yol verilməsin.

AMEA əməkdaşlarının məzuniyyət müddəti uzadılır

AMEA-nın prezidenti, akademik Ramiz Mehdiyev “Azərbaycan Respublikasının ərazisində xüsusi karantin rejiminin uzadılması ilə əlaqədar akademiya əməkdaşlarının işə davamiyyətinin tənzimlənməsi haqqında” Sərəncam imzalayıb.

Sərəncama əsasən, Azərbaycan Respublikası Nazirlər Kabinetinin 31 mart 2020-ci il tarixli Qərarına müvafiq olaraq əməkhaqqı saxlanılmaqla AMEA əməkdaşlarının işə davamiyyəti 28 aprel tarixindən 4 may 2020-ci il saat 00:00-dək təxirə salınır.

Bundan əlavə, AMEA-nın fasiləsiz iş rejimində fəaliyyət göstərən bəzi müəssisə, təşkilat və xidmətlərində təxirə salınması mümkün olmayan işlərin xüsusi əmək rejiminin qaydalarına riayət edilməklə yerinə yetirilməsi tövsiyə olunub.

Xatırladaq ki, Azərbaycan Respublikası Nazirlər Kabinetinin 18 aprel 2020-ci il tarixli qərarına əsasən ölkə ərazisində xüsusi karantin rejimi 2020-ci il 4 may saat 00:00-dək uzadılıb, həmçinin xüsusi karantin rejimi ilə əlaqədar Azərbaycan Respublikasının Nazirlər Kabineti və Azərbaycan Respublikasının Nazirlər Kabineti yanında Operativ Qərargah tərəfindən daha əvvəl müəyyən edilmiş bütün məhdudiyyətlər, tələblər və rejimlər həmin müddət ərzində qüvvədə saxlanılıb.

© Mənbə: www.science.az

ELAN

17 mart 2020-ci il tarixində saat 11:00-da АMЕА Riyаziyyаt və Mехаnikа İnstitutunun akt zalında D 01.111 dissеrtаsiyа şurаsının nəzdindəki еlmlər dоktоru  dissеrtаsiyаlаrının müzаkirəsi üzrə Elmi tematik sеminаrın növbəti iclasında Elnarə Buxsay qızı Axundovanın ”Üçüncü tərtib adi diferensial operatorlara uyğun spektral ayrılışların yığılması” mövzusunda 1211.01 – ”Diferensial tənliklər”  ixtisasında riyaziyyat üzrə  fəlsəfə doktoru dissertasiya işinin müzakirəsi keçiriləcəkdir.

© Bütün hüquqlar qorunur. Xəbərlərdən istifadə edərkən www.imm.az saytına istinad zəruridir.

ELAN

AMEA Riyaziyyat və Mexanika İnstitutunda Beynəlxalq Riyaziyyat gününə həsr olunmuş “Riyaziyyat bütün elmlərin şahıdır” adlı tədbir 13 mart 2020-ci il tarixində saat 1100-da İnstitutunun akt zalında keçiriləcək.

© Bütün hüquqlar qorunur. Xəbərlərdən istifadə edərkən www.imm.az saytına istinad zəruridir.