“Sadə lay və ikiqat lay potensiallarının törəməsinin əmələ gətirdiyi operatorların bəzi xassələri” mövzusunda seminar keçirilib

“Riyazi analiz” şöbəsinin “Harmonik analizin müasir problemləri və tətbiqləri” adlı seminarı keçirilib. Seminarda Azərbaycan Dövlət Neft və Sənaye Universitetinin “Ümumi və tətbiqi riyaziyyat” kafedrasının dosenti Xəlilov Elnur Həsən oğlu “Sadə lay və ikiqat lay potensiallarının törəməsinin əmələ gətirdiyi operatorların bəzi xassələri” mövzusunda məruzə edib.
Məruzədə sadə lay və ikiqat lay potensiallarının törəməsinin əmələ gətirdiyi operatorların ümumiləşmiş Hölder fəzasında bəzi xassələri müzakirə edilib.

© Bütün hüquqlar qorunur. Xəbərlərdən istifadə edərkən www.imm.az saytına istinad zəruridir.

Riyaziyyat və Mexanika İnstitutunda 20 Yanvar faciəsinin 28-ci ildönümünə həsr olunmuş anım tədbiri keçirilib

Bu gün AMEA Riyaziyyat və Mexanika İnstitutunda 20 Yanvar faciəsinin 28-ci ildönümünə həsr olunmuş anım tədbiri keçirilib. Tədbiri giriş sözü ilə institutun direktoru, AMEA-nın müxbir üzvü, professor Misir Mərdanov açaraq 1990-cı ildə yaşananları tədbir iştirakçıları ilə bölüşüb.
Qeyd edib ki, Vətən uğrunda canlarını qurban vermiş mərd, igid oğul və qızlarımızın uyuduğu Şəhidlər xiyabanı xalqımız üçün müqəddəs and yerinə, milli iradəmizin şanlı-şərəfli bir salnaməsinə çevrilib. Şəhidlərimiz və Şəhidlər xiyabanı azadlığımızın, müstəqilliyimizin, milli iradəmizin simvolu kimi bundan sonrakı nəsillərə də bir qürur mənbəyi olacaqdır.
Misir Mərdanov bu qanlı tarixi ilk dəfə layiqincə qiymətləndirən Ulu öndər Heydər Əliyevin şücayətindən danışıb. İlk dəfə 20 Yanvar faciəsinə görə çəkinmədən Qorbaçovu günahlandıran Heydər Əliyevin vətən sevgisindən bəhs edib.
Daha sonra Riyaziyyat və Mexanika İnstitutunun aspirantı olmuş, xalqın igid övladı – şəhid Yusif Sadıqovun fədakarlığı məhəbbətlə xatırlanıb, onun və bütün şəhidlərimizin əziz xatirəsi böyük ehtiramla anılıb.
Tədbirin sonunda şəhidlərin xatirəsi bir dəqiqəlik sükutla yad edilib.
20 yanvar faciəsi tariximizin şərəf və qəhrəmanlıq səhifəsidir. Allah şəhidlərimizə rəhmət eləsin!

© Bütün hüquqlar qorunur. Xəbərlərdən istifadə edərkən www.imm.az saytına istinad zəruridir.

Unudulmaz görkəmli alim

Riyaziyyat və Mexanika İnstitutu

Düz bir il öncə 19 yanvar 2017-ci il tarixində Azərbaycanın tanınmış riyaziyyatçısı, Əməkdar elm xadimi, Azərbaycan SSR Dövlət mükafatı laureatı, AMEA-nın həqiqi üzvü, fizika-riyaziyyat üzrə elmlər doktoru, professor Cəlal Eyvaz oğlu Allahverdiyev 87 yaşında vəfat etmişdir.

Allahverdiyev Cəlal Eyvaz oğlu 17 sentyabr 1929-cu ildə Şuşa şəhərində anadan olmuşdur.
1951-ci ildə Azərbaycan Dövlət Universitetini fərqlənmə diplomu ilə bitirmişdir.
1957-ci ildə fəlsəfə doktoru, 1968-ci ildə elmlər doktoru elmi dərəcələrini, 1969-cu ildə professor elmi adını almış, 1972-ci ildə AEA-nın müxbir üzvü, 2001-ci ildə isə həqiqi üzvü seçilmişdir.
Professor Cəlal Eyvaz oğlu Allahverdiyev Banax və Hilbert fəzalarında spektral parametrdən rasional asılı olan operatorlar üçün məxsusi və qoşma elementlər sisteminin tamlığı, bazisliyi haqqında yeni tip teoremlər isbat etmiş, operatorlarin qapana bilməsi, məhdudluğu, tamam kəsilməz olması üçün (multiplikator terminləri ilə) zəruri və kafi şərtlər tapmış, operatorların məxsusi ədədlərinin təqribi hesablanmasına aid mühüm nəticələr almışdır.
O, Azərbaycanda ilk dəfə stoxastik sistemlərdə idarəetmə, optimal idarəetmə sahəsində işlərə başlamışdır. Həmmüəlliflə səsvermə qurğusunun ideyasının nəzəri əsasını vermiş və müəlliflik şəhadətnaməsi almışdır.
Kompüterlərin iş prinsiplərinin nəzəri əsaslarının araşdırılması, təkmilləşdirilməsi, Azərbaycan dilinin formal qrammatikasının yaradılması istiqamətində mühüm elmi nəticələr almış, deduktiv maşında qeyri-səlis çoxluqların təsviri və deduktiv nəticə alınmasının uyğun mexanizmini vermişdir. Onun ən məşhur elmi nəticəsi Allahverdiyev teoremi adı altında bir çox kitablara, o cümlədən funksional analiz dərsliklərinə salınmışdır. Professor Cəlal Allahverdiyevin elmi rəhbərliyi ilə 6 elmlər doktoru, 40-dan artıq fəlsəfə doktoru hazırlanmışdır. O, 130-dan çox elmi əsərin müəllifi idi.
Akademik elmdə əldə etdiyi nailiyyətlərə görə 1972-ci ildə Azərbaycan SSR Dövlət Mükafatına, 1981-ci ildə isə “Əməkdar elm xadimi” fəxri adına layiq görülmüşdür.
Riyaziyyat və Mexanika İnstitutunun kollektivi professor Cəlal Allahverdiyevin vəfatından kədərlənir , ailəsinə və yaxınlarına dərin hüzünlə başsağlığı verir.
Allah rəhmət eləsin!

© Bütün hüquqlar qorunur. Xəbərlərdən istifadə edərkən www.imm.az saytına istinad zəruridir.

 

“Bir sinif üçüncü tərtib diferensial tənliklərin həlli” mövzusunda seminarı keçirilib

“Diferensial tənliklər” şöbəsinin növbəti seminarı keçirilib. Seminarda Bakı Dövlət Universitetinin müəllimi Miqdad İsmayılov “Bir sinif üçüncü tərtib diferensial tənliklərin həlli” mövzusunda çıxış edib.
Məruzədə bir sinif üçüncü tərtib xüsusi törəməli diferensial tənliklər üçün qarışıq məsələnin ümumiləşmiş həllinin varlığı və yeganəliyi haqqında danışılıb.

© Bütün hüquqlar qorunur. Xəbərlərdən istifadə edərkən www.imm.az saytına istinad zəruridir.

AMEA Riyaziyyat və Mexanika İnstitutunun magistrantları imtahan veriblər

17 yanvar tarixlərində AMEA-nın Riyaziyyat və Mexanika İnstitutunda “Riyazi analiz, Diferensial tənliklər, Optimallaşdırma və optimal idarəetmə, Riyazi fizika tənlikləri” ixtisasları üzrə magistr pilləsində təhsil alan I kurs tələbələri üçün “Riyaziyyatın müasir problemləri ”, II kurs tələbələri üçün isə “Hesablama üsulların elmi və texniki məsələlərin tətbiqi” fənnindən imtahanlar keçirilib.

Keçirilmiş imtahanlar uğurla başa çatıb.

© Bütün hüquqlar qorunur. Xəbərlərdən istifadə edərkən www.imm.az saytına istinad zəruridir.

“Bütün oxda dördtərtibli inteqro-differensial operatorun spektrinin araşdırılması” mövzusunda Ümuminstitut seminarı keçirilib

Bu gün AMEA Riyaziyyat və Mexanika İnstitutunda 2018-ci ilin ilk Ümuminstitut seminarı keçirilib. Ümuminstitut seminarında ADİU-nun “Riyaziyyat” kafedrasının professoru Musa Alməmmədov “Bütün oxda dördtərtibli inteqro-differensial operatorun spektrinin araşdırılması” mövzusunda məruzə edib.

Məruzədə bütün oxda dördtərtibli inteqro-differensial operatorun həllərinin asimptotikası, rezolventası və spektri araşdırılıb.

© Bütün hüquqlar qorunur. Xəbərlərdən istifadə edərkən www.imm.az saytına istinad zəruridir.