E L A N

19.01.2018-ci il saat 11:00-da “Riyazi analiz” şöbəsinin “Harmonik analizin müasir problemləri və tətbiqləri” adlı seminarı keçiriləcəkdir. Seminarda Azərbaycan Dövlət Neft və Sənaye Universitetinin “Ümumi və tətbiqi riyaziyyat” kafedrasının dosenti Xəlilov Elnur Həsən oğlu “Sadə lay və ikiqat lay potensiallarının törəməsinin əmələ gətirdiyi operatorların bəzi xassələri” mövzusunda məruzə edəcəkdir.

Məruzədə sadə lay və ikiqat lay potensiallarının törəməsinin əmələ gətirdiyi operatorların ümumiləşmiş Hölder fəzasında bəzi xassələri araşdırılacaqdır.

© Bütün hüquqlar qorunur. Xəbərlərdən istifadə edərkən www.imm.az saytına istinad zəruridir.

Elmin İnkişaf Fondu gənc alim və mütəxəssislərin “Mənim ilk qrantım” müsabiqəsinin nəticələrini açıqladı

Azərbaycan Respublikasının Prezidenti cənab İlham Əliyevin 2011-ci il 6 aprel tarixli 1418 nömrəli Sərəncamı ilə təsdiq edilmiş “Azərbaycan gəncliyi 2011-2015-ci illərdə” Dövlət Proqramı və bu Proqramın həyata keçirilməsi üzrə Tədbirlər planının 6.3.2 bəndinə əsasən, Azərbaycan Respublikasının Prezidenti yanında Elmin İnkişafı Fondu mütəmadi olaraq 35 yaşadək olan gənc alim və mütəxəssislər üçün qrant müsabiqələrini təşkil edərək keçirib və bu ənənə müxtəlif formatlarda bu gün də davam etdirilir.

Gənc alim və mütəxəssislərin Fondun qrantları vasitəsilə dəstəklənməsi ölkədə kadr potensialının artırılması işinə xüsusi töhfə sayıla bilər.

Fond fəal çalışan gənc alimlər haqqında məlumat bazasının yaradılması üzrə işləri də yerinə yetirir. Ölkənin gənc alimləri adıçəkilən xüsusi müsabiqələrdə iştirakla yanaşı, Fondun digər müsabiqələrində də layihə üzrə yaradıcı kollektivlərin tərkibində elmi-tədqiqat işlərinin yerinə yetirilməsində fəallıq göstərirlər.

Gənc alim və mütəxəssislərin 1-ci qrant müsabiqəsi çərçivəsində 25, 2-ci müsabiqəsi üzrə 25 və  3-cü müsabiqəsi çərçivəsində 24 layihə qalib elan edilib, ötən illər ərzində bu layihələr uğurla yerinə yetirilib.

Keçirilmiş müsabiqələrin uğurları əsas götürülməklə, növbəti 4-cü müsabiqə Elmin İnkişafı Fondu və Azərbaycan Respublikasının Gənclər və İdman Nazirliyi tərəfindən birgə təşkil olunaraq “Mənim ilk qrantım” müsabiqəsi formatında keçirilib.

Məqsəd ölkədə təbiət, dəqiq, texniki, humanitar və ictimai elmlər sahəsində dövlət və cəmiyyət üçün əhəmiyyət kəsb edən fundamental, tətbiqi və innovasiya xarakterli elmi-tədqiqat proqram və layihələrini və digər elmi tədbirləri dəstəkləmək, aktual və müasir elmi problemlərin həlli ilə məşğul olan gənc alimlərin, bir elmi mövzunun (problemin müəyyən hissəsinin) tədqiqi məqsədi ilə gənc alimlər tərəfindən yaradılmış müvəqqəti yaradıcı kollektivlərin, akademik və təhsil sistemlərində fəaliyyət göstərən, elmi tədqiqatlarla əlaqəli digər qurumlarda (nazirliklərin nəzdindəki elmi-tədqiqat institutları, dövlət qurumları, QHT və s.) çalışan gənc alim və mütəxəssislərin elmi  fəaliyyətini stimullaşdırmaq və onlara əlavə yaradıcılıq imkanı yaratmaq olub.

Müsabiqə ölkədə elmin inkişaf prioritetlərinə uyğun olaraq, Elmin İnkişafı Fondu və Gənclər və İdman Nazirliyi arasında formalaşmış əməkdaşlıq əlaqələrini, bu iki qurum arasında 2017-ci il 22 may tarixində imzalanmış Protokolun müddəalarını nəzərə almaqla keçirilib.

4-cü qrant müsabiqəsinin keçirilməsi haqqında qərar 2017-ci il 25 may tarixində internet səhifəsində və kütləvi informasiya vasitələrində elan edilib, qrant iddiaçılarına kömək məqsədilə bir neçə məsləhət seminarı təşkil edilib, müraciətlərə cavab verilib, ortaya çıxan suallara aydınlıq gətirilib. Müsabiqəyə bütün elm sahələri və qrant növləri üzrə 34 layihə daxil olub, layihələrin ekspertizası işinə Elmin İnkişafı Fondunun daimi ekspertləri və yerli və xarici müstəqil elmi ekspertlər cəlb olunub.

İlk dəfə olaraq gənc alim və mütəxəssislər qrant layihələrini “on-line” şəkildə, Fondun innovativ texnologiyası olan və ASAN-imzanın inteqrasiya edildiyi “e-Qrant” – “Qrant layihələrinin elektron idarəolunması sistemi” vasitəsilə təqdim ediblər.

Elmin İnkişafı Fondunun icraçı direksiyası, daimi və müstəqil elmi ekspertlər təqdim olunmuş layihələrin cari müsabiqənin elmi prioritetlərinə uyğunluq dərəcəsini müəyyənləşdirib, layihələrin elmi səviyyəsini, onların yerinə yetirilməsi imkanlarını və potensialını, gözlənilən elmi nəticələrini, mümkün tətbiq ehtimalını ekspertiza qaydalarına uyğun olaraq xüsusi sistem üzrə qiymətləndirib, həmçinin maliyyələşdirilmənin məqsədəuyğunluğu və həcmi barədə rəylər, arayışlar və tövsiyələr hazırlayıb.

Nəticələr Elmin İnkişafı Fondu və Gənclər və İdman Nazirliyinin Birgə Komissiyasında da müzakirə olunub.

Gənc alim və mütəxəssislərin 4-cü qrant müsabiqəsi (“Mənim ilk qrantım”) üzrə ümumi maliyyələşdirilmə həcmi 600000 manat olmaqla 19 qalib layihə müəyyənləşdirilib və Elmin İnkişafı Fondunun qərarı ilə təsdiq olunub. Uğur dərəcəsi (daxil olan və qalib olan layihələrin sayı üzrə) kifayət qədər yüksək (56%) olub.

Bu qrantlar yalnız ilk dəfə qrant üçün müraciət edən gənc alim və mütəxəssislərə verilib. Multidissiplinar və tətbiqi xarakterli tədqiqatlara, müxtəlif akademik və təhsil qurumlarından, sahə elmi-tədqiqat institutlarından olan alim və mütəxəssislər tərəfindən yerinə yetirilməsi planlaşdırılan elmi-tədqiqat mövzuları üzrə təqdim olunmuş layihələrə elmi ekspertizanın nəticələri əsasında seçim zamanı üstünlük verilib.

Gənc alim və mütəxəssislərin 4-cü qrant müsabiqəsi üzrə qalib layihələr AMEA-nın Fizika, Riyaziyyat və Mexanika, Radiasiya Problemləri, Neft-Kimya Prosesləri, Aşqarlar Kimyası, Geologiya və Geofizika, Neft və Qaz, Molekulyar Biologiya və Biotexnologiyalar, Ədəbiyyat institutlarında, AMEA Naxçıvan Bölməsinin Bioresurslar institutunda, həmçinin Azərbaycan Dövlət Neft və Sənaye Universiteti, Bakı Slavyan Universitetində, Səhiyyə Nazirliyinin Milli Onkologiya Mərkəzində, Azərbaycan Tələbə Gənclər Təşkilatları İttifaqında, “Gənclər Turizmi” ictimai birliyində və “Azərbaycan Elm Assosiasiyası”nda yerinə yetiriləcək.

Qalib layihələrdən 17-si fundamental-tətbiqi xarakterlidir, 2 layihə üzrə isə Azərbaycan Xalq Cümhuriyyətinin yaradılmasının 100 illiyinə həsr edilmiş “Neft və geoekologiya” mövzusunda 1-ci beynəlxalq məktəb-seminar və “Davamlı sağlamlıq turizminin ölkənin iqtisadiyyatında rolu” mövzusunda gənc alim və mütəxəssislərin beynəlxalq konfransı təşkil olunaraq keçiriləcək.

Fizika-riyaziyyat və texnika elmləri üzrə 3 layihə, Yer haqqında elmlər üzrə 3 layihə, Kimya elmləri üzrə 4 layihə, Biologiya, tibb və aqrar elmləri üzrə 3 layihə, Humanitar və ictimai elmlər üzrə isə 6 layihə qalib olub. Qalib layihə rəhbərlərindən 14-ü qadın, 5-i isə kişidir.

Qarşıdan gələn günlərdə qalib layihə rəhbəri və icraçıları ilə Elmin İnkişafı Fondunun təqdimat xarakterli ənənəvi görüşü keçiriləcək.

http://sdf.gov.az/development/uploads/cari_qrant/eif-gam-4-bgm-gin-2017-3-29_qalibler.pdf

Mənbə: www.sdf.gov.az

Rus-Azərbaycan məktəblərinin yaranmasının səbəbi nə idi?

– Rus-Azərbaycan məktəblərinin yaranmasının səbəbi nə idi?

Əsası Abbasqulu ağa Bakıxanov, Mirzə Şəfi Vazeh, Mirzə Fətəli Axundzadə, İsmayıl bəy Qutqaşınlı və başqaları tərəfindən qoyulan maarifçilik hərəkatı XIX əsrin axırlarında ictimai-pedaqoji fikrin bütün qatlarına nüfuz edir, xalqın milli şüurunu formalaşdırdı. Maarifçilər və onların ardıcılları dərk edirdilər ki, xalqın maariflənməsi millətin tərəqqisinin ən mühüm şərtidir. Rus mədəniyyəti ilə yaxından tanışlıq Azərbaycanda rus məktəbləri nümunəsində yeni tədris müəssisələrinin – rus – Azərbaycan məktəblərinin meydana gəlməsinə səbəb oldu. Belə məktəb ilk dəfə Taixitdin Mamleyev tərəfindən Qazax qəzasının Salahlı kəndində (1875-ci il), sonra isə 1887-ci ildə Bakıda açılmışdı. Məktəb həmin ilin oktyabrında fəaliyyətə başladı. Bu, birsinfli üçüncü dərəcəli xüsusi rus-Azərbaycan məktəbi idi. Məktəbə elə ilk aylarda 60 şagird qəbul olunmuş, qısa bir vaxtdan sonra onların sayı 70 nəfərə çatmışdır. Məktəbin tədris planına ana dili, rus və fars dilləri, hesab, coğrafiya, tarix, şəriət fənləri daxil idi.

Mənbə: Misir Mərdanov. Azərbaycanın təhsil tarixi. “Təhsil” nəşriyyatı, 2011-ci il. Bakı, I cild, 295 s.

© Bütün hüquqlar qorunur. Xəbərlərdən istifadə edərkən www.imm.az saytına istinad zəruridir.

Dissertasiya şurasının iclası keçiriləcək

19 yanvar 2018-ci il tarixində saat 16:00-da AMEA RMİ-nın nəzdində elmlər doktoru və fəlsəfə doktoru elmi dərəcəsi almaq üçün təqdim olunan dissertasiyaların müdafiəsini keçirən D.01.111 birdəfəlik dissertasiya şurasının iclasında Seymur Arif oğlu Meşaikin “Sonlu qiymətli məntiq cəbrlərinin laylaşdırılmış düz hasillərinin struktur xassələri” mövzusunda 1205.01- Riyazi məntiq və ədədlər nəzəriyyəsi ixtisasından riyaziyyat üzrə fəlsəfə doktoru elmi dərəcəsi almaq üçün təqdim edilmiş dissertasiyanın müdafiəsi AMEA Riyaziyyat və Mexanika İnstitutunun akt zalında keçiriləcək.

Təqdim edilmiş dissertasiyanın avtoreferatına baxmaq üçün aşağıdakı linkə keçid edin:

http://www.imm.az/avtoref/2018/19.01.2018_Seymur_Mesaik.pdf

© Bütün hüquqlar qorunur. Xəbərlərdən istifadə edərkən www.imm.az saytına istinad zəruridir.

Molla Pənah Vaqif (1717-1797) kim idi?

– Molla Pənah Vaqif (1717-1797) kim idi?

-Lap gənc yaşlarından məktəbdarlıqla məşğul olduğundan, xalq arasında Molla Pənah adı ilə tanınmışdır. Vaqif ilk təhsilini dövrünün tanınmış ziyalısı Şəfi Əfəndidən almışdır. Şəfi Əfəndi həm də şair idi.

Deyilənlərə görə, Molla Pənah Vaqif Qarabağa gəlməmişdən öncə Gəncəyə gəlmiş, bir müddət burada Şah Abbas məscidinin hücrələrinin birində məktəbdarlıqla məşğul olmuşdur.

Molla Pənah Vaqif 1759-cu ildə Qarabağa gəlmişdir. O, bir müddət indiki Füzuli rayonunun Veysəlli kəndində yaşamış, burada müəllimlik etmişdir. Daha sonra o, Şuşanın Saatlı məhəlləsinə köçmüş və burada məktəb açıb müəllimlik etmişdir.

Molla Pənah Vaqif həyatı dərk edən bir müəllim kimi zəmanəsinin acınacaqlı vəziyyətini, xalqın maddi və mənəvi sıxıntılar keçirdiyini, sadəcə müşahidə etmiş, şüurları oyatmağa, ağır həyat tərzini aradan qaldırmaq üçün xalqı hərəkətə gətirməyə çalışmış, böyüyən nəslin elm, kamal sahibi olmasını arzulamışdır.

O, müəllim işlədiyi vaxt ədəbi yaradıcılıqlada məşğul olmuş şeirləri xalq tərəfindən sevilərək dildən-dilə düşmüşdür. O, həmin dövrdə xalq şeir üslubunda gözəl sənət nümunələri yaratmış və Azərbaycan ədəbiyyatı tarixində öz ədəbi izini qoymuşdur.

Molla Pənah Vaqif Qarabağ xanının vəziri olmuş, xanlığın xarici və daxili siyasətində mühüm rol oynamışdır. Şairin Şuşa qalasının abadlaşdırılmasında, təmir işlərində də xidmətləri olmuşdur.

Xalq Molla Pənah Vaqifi gözəl şeirlərinə, biliyinə, ağıl və fərasətinə görə sevir və onu çox yüksək mərtəbədə görürdü. Onun haqqında “Hər oxuyan Molla Pənah olmaz” məsəli də təsadüfən yaranmamışdır.

Mənbə: Misir Mərdanov. Azərbaycanın təhsil tarixi. “Təhsil” nəşriyyatı, 2011-ci il. Bakı, I cild, 295 s.

© Bütün hüquqlar qorunur. Xəbərlərdən istifadə edərkən www.imm.az saytına istinad zəruridir.

E L A N

17.01.2018-ci il tarixində saat 12.00-da “Diferensial tənliklər” şöbəsinin növbəti seminarı keçiriləcəkdir. Seminarda Bakı Dövlət Universitetinin müəllimi Miqdad İsmayılov “Bir sinif üçüncü tərtib diferensial tənliklərin həlli” mövzusunda çıxış edəcəkdir.
Məruzədə bir sinif üçüncü tərtib xüsusi törəməli diferensial tənliklər üçün qarışıq məsələnin ümumiləşmiş həllinin varlığı və yeganəliyi haqqında danışılacaq.
Arzu edənlər iştirak edə bilərlər.

© Bütün hüquqlar qorunur. Xəbərlərdən istifadə edərkən www.imm.az saytına istinad zəruridir.