Bakı Dövlət Universitetinin təsis etdiyi jurnalın ilk nömrəsi çapdan çıxıb

Bakı Dövlət Universitetinin (BDU) rektoru, akademik Abel Məhərrəmovun baş redaktoru olduğu “New Materials, Compounds and Applications” (“Yeni materiallar, birləşmələr və tətbiqləri”) və “Low Dimensional Systems” (“Aşağı ölçülü sistemlər”) jurnallarının ilk nömrələri çapdan çıxıb.

Universitetdən bildiriblər ki, “New Materials, Compounds and Applications” jurnalı “Jomard Publishing” nəşriyyatı, “Low Dimensional Systems” jurnalı isə BDU tərəfindən təsis edilib. Jurnalın redaksiya heyətinə dünyanın inkişaf etmiş 15-dən çox ölkəsini təmsil edən tanınmış alimlər daxildir.

Jurnalın ilk nömrəsi BDU-nun qarşıdan gələn 100 illik yubileyinə həsr edilib. Redaksiya heyətinin tərkibi, çap olunmuş məqalələrin coğrafiyası və elmi səviyyəsi jurnalların tezliklə dünya elmi mühiti tərəfindən qəbul ediləcəyinə və elmi indeksləmə bazalarına daxil olacağına əsas verir.

Mənbə: https://azertag.az

İnstitutumuzun “Qeyri-harmonik analiz” şöbəsinin müdiri, AMEA-nın müxbir üzvü, profesor  Bilal Bilalovun 55 yaşı tamam olur

bilal_bilalov

Bu gün görkəmli riyaziyyatçı alim, Riyaziyyat və Mexanika İnstitutunun “Qeyri-harmonik analiz” şöbəsinin müdiri, AMEA-nın müxbir üzvü, profesor  Bilal Telman oğlu Bilalovun 55 yaşı tamam olur.

Bilal Telman oğlu Bilalov 02 yanvar 1963-cü ildə Azərbaycan Respublikası Qazax rayonunun Fərəhli kəndində anadan olmuşdur. 1986-cı ildə M.V. Lomonosov adına Moskva Dövlət Universitetinin (MDU) tətbiqi riyaziyyat fakültəsini bitirmiş, 1986-1989-cu illərdə MDU-nun əyani aspirant olmuş, 1989-cu ildə akademik Y.İ.Moiseyevin rəhbərliyi ilə “Bəzi xüsusi sistemlərin tamlığı və bazisliyi” mövzusunda MDU-da namizədlik dissertasiyasını müdafiə etmişdir.

O, 1990-1993-cü illərdə Azərbaycan Texnologiyaları İnstitutunda assistent işləmişdir. 1993-1996-cı illərdə MDU-da əyani doktorant olmuş və 1996-cı ildə orada “Üstlü sistemlərin bazislik xassələri və onların ümumiləşmələri” mövzusunda fizika-riyaziyyat elmləri doktoru elmi dərəcəsini almaq üçün doktorluq dissertasiyasını müdafiə etmişdir. Həmin ildən AMEA Riyaziyyat və Mexanika İnstitutunda böyük elmi işçi, baş elmi işçi, 2001-ci ildən indiyə kimi “Qeyri-harmonik analiz” şöbəsinin müdiridir.

Professor Bilal Bilalov 2009-cu ildən riyazi analiz ixtisası üzrə professor, 2014-cü ildə AMEA-nın müxbir üzvü seçilmişdir.

AMEA-nın müxbir üzvü, professor Bilal Bilalovun əsas elmi fəaliyyət sahələri: approksimasiya nəzəriyyəsi; bazis nəzəriyyəsi; freym nəzəriyyəsi; wavelet analiz; operatorların spektral nəzəriyyəsi; analitik funksiyalar üçün sərhəd məsələsi; fazzi nəzəriyyəsi; tanınmanın riyazi metodlarıdır. Bu istiqamətlər üzrə alim tərəfindən bir çox mühüm nəticələr alınıb.

Professor Bilalov 190-dan çox elmi işlərin və üç monoqrafiyanın müəllifidir. O, 15 nəfər riyaziyyat üzrə fəlsəfə doktoru hazırlamış, elmi məsləhətçisi olduğu 3 tələbəsinin elmlər doktoru dissertasiyaları Ali Attestasiya Komissiyasına təqdim edilmişdir.

Bilal Bilalov həmçinin Thomson Reuters agentliyinin Emerging Sources Citation İndex (ESCI) kataloquna daxil olan “Azerbaijan Journal of Mathematics” jurnalının baş redaktorudur.

Elmi nailiyyətlərinə görə o, 2013-cü ildə AMEA-nın Fəxri fərmanı ilə təltif olunub.

Alim Azərbaycan Riyaziyyat Cəmiyyətinin İdarə Heyətinin, Nazirlər Kabineti yanında Terminologiya Komissiyasının üzvü, Azərbaycan Respublikasının Prezidenti yanında Elmin İnkişafı Fondunun rəyçisidir.

AMEA Riyaziyyat və Mexanika İnstitutun kollektivi Bilal müəllimi 55 illik yubileyi münasibətilə təbrik edir, ona can sağlığı və gələcək elmi fəaliyyətində yeni nailiyyətlər arzulayır.

© Bütün hüquqlar qorunur. Xəbərlərdən istifadə edərkən www.imm.az saytına istinad zəruridir.

Azərbaycan Respublikasının Prezidenti İlham Əliyevin Dünya azərbaycanlılarına təbriki

Əziz həmvətənlər!

Hörmətli soydaşlar!

Milli birlik və Vətənə məhəbbət kimi nəcib duyğuları təcəssüm etdirən 31 Dekabr – Dünya Azərbaycanlılarının Həmrəylik Günü ərəfəsində hər birinizi ürəkdən salamlayır və ən xoş arzularımı çatdırıram.

Qəlbi həmişə doğma yurda sevgi hissi ilə döyünən bütün soydaşlarımızın milli-mənəvi dəyərlərə bağlılığı və Azərbaycanla əlaqələrinin daha da möhkəmləndirilməsi daim dövlətimizin diqqət mərkəzindədir. Ümummilli lider Heydər Əliyevin irəli sürdüyü azərbaycançılıq məfkurəsinə əsaslanan ardıcıl tədbirlər xaricdə yaşayan həmvətənlərimizin daha sıx birliyinin təşəkkül tapmasına təkan vermiş, ölkəmizin dünya dövlətləri ilə qarşılıqlı faydalı münasibətlərinin inkişafında diaspor təşkilatlarının rolunu xeyli gücləndirmişdir.

Bu gün Azərbaycan Respublikası böyük iqtisadi, siyasi və mədəni potensiala malikdir. Bu potensial dövrün mürəkkəb çağırışlarına adekvat cavab vermək üçün bizə geniş imkanlar açır. Müstəqil dövlət kimi öz yolunu inamla davam etdirən ölkəmizdə qlobal maliyyə-iqtisadi böhranın təsirləri aradan qaldırılmış, sosial-iqtisadi inkişafın dayanıqlığı və davamlı ictimai-siyasi sabitlik təmin olunmuşdur. Təşəbbüskarı olduğumuz transmilli layihələrin həyata keçirilməsində yüksək nailiyyətlər qazanmışıq. Nəhəng neft şirkətləri ilə “Əsrin müqaviləsi”nin 2050-ci ilə qədər uzadılmasına dair sazişin imzalanması, Bakı-Tbilisi-Qars dəmir yolunun istifadəyə verilməsi, Şimal-Cənub nəqliyyat dəhlizinin ölkəmizdən keçən hissəsində işlərin başa çatdırılması respublikamızın tərəqqisi və xalqımızın rifahının yüksəlməsinə xidmət edir, Azərbaycanın dünyadakı geostrateji əhəmiyyətini artırır.

Mədəniyyətlərarası dialoqun təşviqi və ümumbəşəri problemlərin həlli sahəsində dövlətimizin ardıcıl və qətiyyətli mövqeyi beynəlxalq aləmdə rəğbət hissi ilə qarşılanır. 2017-ci ilin ölkəmizdə “İslam Həmrəyliyi İli” elan edilməsi, IV Ümumdünya Mədəniyyətlərarası Dialoq Forumunun və IV İslam Həmrəyliyi Oyunlarının uğurla keçirilməsi Azərbaycanın multikulturalizmə və tolerantlıq ənənələrinə sadiq olduğunu bütün dünyaya bir daha nümayiş etdirdi.

Biz Vətənimizin hərtərəfli inkişafı ilə bağlı qarşıya qoyduğumuz məqsədlərə çatmaq üçün əzmlə çalışırıq. Ölkəmizin beynəlxalq əlaqələrinin genişlənməsində, qədim və zəngin mədəniyyətinin təbliğində, Azərbaycana qarşı təxribatçı əməllərin qarşısının alınmasında diaspor təşkilatlarının da üzərinə mühüm vəzifələr düşür. Buna görə də xaricdə yaşayan həmvətənlərimiz milli maraqlarımızın müdafiəsi naminə azərbaycançılıq ideyası ətrafında sıx birləşməlidirlər. İnanıram ki, sizin məqsədyönlü və birgə fəaliyyətiniz gücümüzü daha da artıracaq, hamımızı dərindən narahat edən Ermənistan-Azərbaycan, Dağlıq Qarabağ münaqişəsinin tezliklə nizamlanmasına, ölkəmizin ərazi bütövlüyünün bərpasına sanballı töhfəsini verəcəkdir.

Sizə bu yolda möhkəm iradə və mütəşəkkillik, şəxsi həyatınızda səadət və firavanlıq arzulayıram.

Bayramınız mübarək olsun!

İlham Əliyev

Azərbaycan Respublikasının Prezidenti

AMEA Fizika-Riyaziyyat və Texnika Elmləri Bölməsinin illik hesabatı təqdim edildi

Dekabrın 28-də AMEA İnformasiya Texnologiyaları İnstitutunda AMEA Fizika-Riyaziyyat və Texnika Elmləri Bölməsi institutlarının 2017-ci ili əhatə edən hesabat iclası keçirildi.

İclası bölmənin akademik-katibi, AMEA Fizika İnstitutunun direktoru, akademik Nazim Məmmədov tədbiri giriş sözü ilə açaraq gündəlikdə duran məsələlər haqqında məlumat verdi. İclasın Fizika-Riyaziyyat və Texnika Elmləri Bölməsinə daxil olan 7 institutun cari ildəki fəaliyyətinin müzakirəsinə həsr olunduğunu bildirdi.

AMEA Fizika İnstitutunun illik hesabatını təqdim edən institutun elmi işlər üzrə direktor müavini, akademik Cavad Abdinov bildirdi ki, hesabat ilində institut əməkdaşları tərəfindən kondensə olunmuş hal fizikası, optoelektronikanın fiziki əsasları və texnikası, energetikanın fiziki-texniki problemləri və nüvə fizikası istiqamətlərində 4 mövzu üzrə 37 elmi-tədqiqat işi aparılmışdır. Xarici ölkələrin nüfuzlu jurnallarında 258, o cümlədən yüksək impakt faktorlu jurnallarda 226 məqalə, respublikada isə 89 məqalə çap olunmuşdur. 2017-ci ildə institut əməkdaşlarının məqalələrinə 1116 istinad qeydə alınmışdır.

AMEA İdarəetmə Sistemləri İnstitutunun illik hesabatı ilə bağlı çıxış edən institutun direktoru, akademik Telman Əliyev bildirdi ki, cari ildə institutda 17 mövzu üzrə, 43 elmi-tədqiqat işi aparılmış və onlardan 6-sı başa çatdırılmışdır. Hesabat ilində 2 elmlər və 5 fəlsəfə doktoru elmi dərəcəsi almaq üçün dissertasiya işləri müdafiə edilmişdir.

T.Əliyev 2017-сi ildə institut əməkdaşları tərəfindən 344 elmi əsərin, o cümlədən, 4 monoqrafiyanın və 106-sı xaricdə olmaqla 165 məqalənin çap edildiyini bildirdi. Onlardan 26-sı “Thomson Reuters”, 26-sı “Scopus” bazaları, 48-i isə digər xarici nüfuzlu jurnallarda dərc olunmuşdur.

AMEA Riyaziyyat və Mexanika İnstitutunun illik hesabatını təqdim edən institutun direktoru, AMEA-nın müxbir üzvü Misir Mərdanov cari ildə rəhbərlik etdiyi qurumda mühüm elmi-tədqiqat və elmi-təşkilati tədbirlərin həyata keçirildiyini diqqətə çatdırdı. Bildirdi ki, hesabat ili ərzində institut əməkdaşlarının bütövlükdə 386 elmi əsəri – 140-ı xaricdə olmaqla 198 məqalə, 71-i xaricdə olmaqla 167 tezis, 15 elmi populyar nəşr, həmçinin monoqrafiya və dərs vəsaiti işıq üzü görmüşdür. Məqalələrdən 67-si “Thomson Reuters” beynəlxalq elmi bazasının impakt faktorlu jurnallarında çap edilmişdir. M.Mərdanov qeyd etdi ki, 2017-ci ildə institutda 7 elmlər doktoru və 8 fəlsəfə doktoru müdafiə etmişdir.

AMEA Radiasiya Problemləri İnstitutunun (RPİ) direktoru, AMEA-nın müxbir üzvü Oqtay Səmədov institutun illik hesabatı ilə bağlı çıxış edərək bildirdi ki, 2017-ci ildə 4 problem üzrə 12 mövzuya uyğun 24 elmi-tədqiqat işi yerinə yetirilmişdir.

O, həmçinin Radiasiya Problemləri İnstitutunun əməkdaşları tərəfindən Rusiya Federasiyasının Dubna Birləşmiş Nüvə Tədqiqatları İnstitutunda aparılan elmi tədqiqatlar barədə məlumat verdi, RPİ-də fəaliyyət göstərən Beynəlxalq Nüvə Məlumatlar Mərkəzinin öz işini uğurla davam etdirdiyini söylədi.

O.Səmədov cari ildə institut əməkdaşları tərəfindən 261 elmi-tədqiqat işinin yerinə yetirildiyini və 38-i impakt faktorlu jurnallarda olmaqla ümumilikdə 120 məqalənin dərc edildiyini diqqətə çatdırdı.

AMEA Nəsirəddin Tusi adına Şamaxı Astrofizika Rəsədxanasının direktoru, AMEA-nın müxbir üzvü Namiq Cəlilov qurumun illik hesabatını təqdim edərək cari ildə əldə olunmuş elmi nailiyyətləri və praktiki astrofizika sahəsində görülən işləri diqqətə çatdırdı. Bildirdi ki, institutda ümumilikdə 57 kitab, monoqrafiya və məqalə işıq üzü görmüş, impakt faktorlu jurnallarda 13 məqalə dərc olunmuş, elmi işçilərin məqalələrinə 97 istinad qeydə alınmışdır.

AMEA Biofizika İnstitutunun direktoru, AMEA-nın müxbir üzvü Oktay Qasımov çıxış edərək cari ildə institutda aparılmış elmi tədqiqatlar, həyata keçirilmiş layihələr və görüləcək işlər barədə məlumat verdi.

Sonra AMEA-nın akademik-katibi, AMEA İnformasiya Texnologiyaları İnstitutunun direktoru, akademik Rasim Əliquliyev rəhbərlik etdiyi elmi müəssisədə 2017-ci ildə əldə olunmuş elmi nailiyyətləri diqqətə çatdırdı. O, Big Data və Data mining, bulud texnologiyaları, informasiya təhlükəsizliyi, biometrik texnologiyalar, elektron tibb, proqram mühəndisliyi istiqamətlərində araşdırmaların aparıldığını, mühüm elmi nəticələrin əldə edildiyini diqqətə çatdırdı.

Bildirdi ki, hesabat ili ərzində institut əməkdaşları tərəfindən 84 məqalə, 4 kitab və 2 ekspress-informasiya nəşr olunmuş, beynəlxalq və respublika səviyyəli konfranslarda 126 məruzə ilə iştirak edilmişdir. Cari il üzrə nəşr olunmuş 210 elmi əsərdən 87-si nüfuzlu bazalara daxil olmuşdur.

R.Əliquliyev, həmçinin 2017-ci ildə institutda həyata keçirilən elmi-təşkilati və elmi-innovasiya fəaliyyəti, beynəlxalq əməkdaşlıq, beynəlxalq layihələr, ali təhsil müəssisələri ilə əməkdaşlıq və digər istiqamətdə görülən işlər haqqında məlumat verdi.

Müzakirələrdən sonra bölmə institutlarının hesabatları qəbul olundu.

© Bütün hüquqlar qorunur. Xəbərlərdən istifadə edərkən www.imm.az saytına istinad zəruridir.

“Qeyri-harmonik analiz” şöbəsinin 2017-ci il üçün elmi və təşkilati fəaliyyəti haqqında

Hesabat dövrü ərzində “Qeyri-harmonik analiz ” şöbəsində “Freym nəzəriyyəsi və onun tətbiqləri” və “Öz-özünə qoşma olmayan diferensial operatorların spektral xassələri” mövzuları üzrə elmi tədqiqat işləri aparılmış və 15 iş yerinə yetirilmişdir.

Şöbənin həftənin 3-cü günləri ( 12:00 ) və 4-cü günləri (11:00) müntəzəm elmi seminarları keçirilir. Şöbə əməkdaşlarının əksəriyyəti ali təhsil müəssisələrində pedaqoji fəaliyyətlə məşğuldurlar ( Bilalov Bilal –AMEA RMİ (magistratura pillləsi), Qasımov Telman, İsmayilov Miqdad-Bakı Dövlət Universiteti, Hüseynli Əli, Qarayev Tərlan, Sadıqova Səbinə-Xəzər Universiteti).
Şöbə əməkdaşları tərəfindən cəmi 34 elmi iş çap edilmişdir. Daha ətraflı>>

© Bütün hüquqlar qorunur. Xəbərlərdən istifadə edərkən www.imm.az saytına istinad zəruridir.

Fizika-Riyaziyyat və Texnika Elmləri Bölməsinin fəaliyyəti barədə illik hesabat dinlənilib

AMEA İnformasiya Texnologiyaları İnstitutunda Fizika-Riyaziyyat və Texnika Elmləri Bölməsi institutlarının 2017-ci ili əhatə edən hesabat iclası keçirildi.

Öncə qonaqlar institutda yaradılmış maddi-texniki şəraitlə yaxından tanış oldular. Onlara institutun Multimedia Mərkəzinin nəzdində fəaliyyət göstərən “İnformasiya texnologiyaları” nəşriyyatında təklif olunan xidmətlər və məhsullar, o cümlədən genişformatlı, yüksəksürətli rəqəmsal çap avadanlıqları, müxtəlif kitab, dərslik və jurnalların nəşri ilə bağlı görülən işlər, eləcə də institutun yeni təmirdən çıxmış “Təsərrüfat və mülki müdafiə sahəsi” haqqında ətraflı məlumat verildi.

Sonra bölmənin akademik-katibi, AMEA Fizika İnstitutunun direktoru, akademik Nazim Məmmədov tədbiri giriş sözü ilə açaraq gündəlikdə duran məsələlər haqqında məlumat verdi. İclasın Fizika-Riyaziyyat və Texnika Elmləri Bölməsinə daxil olan 7 institutun cari ildəki fəaliyyətinin müzakirəsinə həsr olunduğunu bildirdi.

Fizika İnstitutunun illik hesabatını təqdim edən institutun elmi işlər üzrə direktor müavini, akademik Cavad Abdinov bildirdi ki, hesabat ilində institut əməkdaşları tərəfindən kondensə olunmuş hal fizikası, optoelektronikanın fiziki əsasları və texnikası, energetikanın fiziki-texniki problemləri və nüvə fizikası istiqamətlərində 4 mövzu üzrə 37 elmi-tədqiqat işi aparılmışdır. Xarici ölkələrin nüfuzlu jurnallarında 258, o cümlədən yüksək impakt faktorlu jurnallarda 226 məqalə, respublikada isə 89 məqalə çap olunmuşdur. 2017-ci ildə institut əməkdaşlarının məqalələrinə 1116 istinad qeydə alınmışdır.

İdarəetmə Sistemləri İnstitutunun illik hesabatı ilə bağlı çıxış edən institutun direktoru, akademik Telman Əliyev bildirdi ki, cari ildə institutda 17 mövzu üzrə, 43 elmi-tədqiqat işi aparılmış və onlardan 6-sı başa çatdırılmışdır. Hesabat ilində 2 elmlər və 5 fəlsəfə doktoru elmi dərəcəsi almaq üçün dissertasiya işləri müdafiə edilmişdir.

T.Əliyev 2017-сi ildə institut əməkdaşları tərəfindən 344 elmi əsərin, o cümlədən, 4 monoqrafiyanın və 106-sı xaricdə olmaqla 165 məqalənin çap edildiyini bildirdi. Onlardan 26-sı “Thomson Reuters”, 26-sı “Scopus” bazaları, 48-i isə digər xarici nüfuzlu jurnallarda dərc olunmuşdur.

Riyaziyyat və Mexanika İnstitutunun illik hesabatını təqdim edən institutun direktoru, AMEA-nın müxbir üzvü Misir Mərdanov cari ildə rəhbərlik etdiyi qurumda mühüm elmi-tədqiqat və elmi-təşkilati tədbirlərin həyata keçirildiyini diqqətə çatdırdı. Bildirdi ki, hesabat ili ərzində institut əməkdaşlarının bütövlükdə 386 elmi əsəri – 140-ı xaricdə olmaqla 198 məqalə, 71-i xaricdə olmaqla 167 tezis, 15 elmi populyar nəşr, həmçinin monoqrafiya və dərs vəsaiti işıq üzü görmüşdür. Məqalələrdən 67-si “Thomson Reuters” beynəlxalq elmi bazasının impakt faktorlu jurnallarında çap edilmişdir. M.Mərdanov qeyd etdi ki, 2017-ci ildə institutda 7 elmlər doktoru və 8 fəlsəfə doktoru müdafiə etmişdir.

Radiasiya Problemləri İnstitutunun (RPİ) direktoru, AMEA-nın müxbir üzvü Oqtay Səmədov institutun illik hesabatı ilə bağlı çıxış edərək bildirdi ki, 2017-ci ildə 4 problem üzrə 12 mövzuya uyğun 24 elmi-tədqiqat işi yerinə yetirilmişdir.

O, həmçinin Radiasiya Problemləri İnstitutunun əməkdaşları tərəfindən Rusiya Federasiyasının Dubna Birləşmiş Nüvə Tədqiqatları İnstitutunda aparılan elmi tədqiqatlar barədə məlumat verdi, RPİ-də fəaliyyət göstərən Beynəlxalq Nüvə Məlumatlar Mərkəzinin öz işini uğurla davam etdirdiyini söylədi.

O.Səmədov cari ildə institut əməkdaşları tərəfindən 261 elmi-tədqiqat işinin yerinə yetirildiyini və 38-i impakt faktorlu jurnallarda olmaqla ümumilikdə 120 məqalənin dərc edildiyini diqqətə çatdırdı.

Nəsrəddin Tusi adına Şamaxı Astrofizika Rəsədxanasının direktoru, AMEA-nın müxbir üzvü Namiq Cəlilov qurumun illik hesabatını təqdim edərək cari ildə əldə olunmuş elmi nailiyyətləri və praktiki astrofizika sahəsində görülən işləri diqqətə çatdırdı. Bildirdi ki, institutda ümumilikdə 57 kitab, monoqrafiya və məqalə işıq üzü görmüş, impakt faktorlu jurnallarda 13 məqalə dərc olunmuş, elmi işçilərin məqalələrinə 97 istinad qeydə alınmışdır.

Biofizika İnstitutunun direktoru, AMEA-nın müxbir üzvü Oktay Qasımov çıxış edərək cari ildə institutda aparılmış elmi tədqiqatlar, həyata keçirilmiş layihələr və görüləcək işlər barədə məlumat verdi.

Sonra AMEA-nın akademik-katibi, İnformasiya Texnologiyaları İnstitutunun direktoru, akademik Rasim Əliquliyev rəhbərlik etdiyi elmi müəssisədə 2017-ci ildə əldə olunmuş elmi nailiyyətləri diqqətə çatdırdı. O, Big Data və Data mining, bulud texnologiyaları, informasiya təhlükəsizliyi, biometrik texnologiyalar, elektron tibb, proqram mühəndisliyi istiqamətlərində araşdırmaların aparıldığını, mühüm elmi nəticələrin əldə edildiyini diqqətə çatdırdı.

Bildirdi ki, hesabat ili ərzində institut əməkdaşları tərəfindən 84 məqalə, 4 kitab və 2 ekspress-informasiya nəşr olunmuş, beynəlxalq və respublika səviyyəli konfranslarda 126 məruzə ilə iştirak edilmişdir. Cari il üzrə nəşr olunmuş 210 elmi əsərdən 87-si nüfuzlu bazalara daxil olmuşdur.

R.Əliquliyev, həmçinin 2017-ci ildə institutda həyata keçirilən elmi-təşkilati və elmi-innovasiya fəaliyyəti, beynəlxalq əməkdaşlıq, beynəlxalq layihələr, ali təhsil müəssisələri ilə əməkdaşlıq və digər istiqamətdə görülən işlər haqqında məlumat verdi.

Müzakirələrdən sonra bölmə institutlarının hesabatları qəbul olundu.

Mənbə:www.science.az