Yeni bir araşdırmaya görə, ChatGPT və digər süni intellekt alətlərindən istifadə “Google”da axtarışla müqayisədə daha səthi bilik əldə etməyə səbəb ola bilər.

AZƏRTAC xəbər verir ki, Pensilvaniya Universitetinin tədqiqatçıları təxminən 10 min tələbəni əhatə edən bir sıra təcrübələr aparıblar. Onlar süni intellekt və axtarış motorlarından istifadənin öyrənmə nəticələrini müqayisə ediblər.

Məlum olub ki, ChatGPT-dən istifadə edən iştirakçılar daha qısa və daha az məlumatverici izahatlar veriblər, faktları nisbətən az xatırlaya biliblər və aldıqları məlumatları ümumiləşdirmək üçün cüzi səy sərf ediblər. Oxşar nəticələr sağlamlıq və bağçılıqla bağlı mövzuları öyrənərkən də müşahidə edilib. Bundan əlavə, digər tələbələr süni intellekt tərəfindən yaradılan məsləhətləri daha az faydalı kimi qiymətləndiriblər.

Norveçin Aqder Universitetinin mütəxəssisləri də tədqiqatın nəticələri ilə bağlı şərhlər veriblər.

“Google”da axtarış apararkən işləməliyik: nəticələri qiymətləndirməli, mənbələri seçməli, məlumatları oxumalı və şərh etməli, sonra isə fərdi fraqmentləri müstəqil şəkildə vahid bir bazada yığmalıyıq. Bu, vaxt və səy tələb edir və məhz bu səy daha dərin öyrənməyə töhfə verir”, – süni intellekt professoru Morten Qudvin izah edir.

Tədqiqat süni intellekt cavablarının dəqiqliyini qiymətləndirməyib. Bununla belə, OpenAI-də çalışanlar da daxil olmaqla, digər alimlər qeyd edirlər ki, “hallüsinasiyalar” hətta ən qabaqcıl süni intellekt modelləri üçün də fundamental problem olaraq qalır. Onlar cavabları təxmin etməyə meyllidir və cahilliyi etiraf etmək əvəzinə, tez-tez səhv məlumatlar verirlər. Oslo Universitetinin professoru Erik Velddalın sözlərinə görə, ChatGPT bilik bazası deyil, ehtimal olunan söz ardıcıllığı yaradan dil modelidir.

azertag.az