“Elm” qəzetinin yeni sayı çap olunub

AMEA Rəyasət Heyətinin həftəlik mətbu orqanı olan “Elm” qəzetinin “Qarabağ Azərbaycandır!” şüarı ilə cari ildə 17-ci nömrəsi işıq üzü görüb.

Qəzetin ilk səhifəsində Prezident İlham Əliyevin “Kiber Kosmos buraxılışı” mövzusunda virtual 71-ci Beynəlxalq Astronavtika Konqresinin açılış mərasimindəki müraciəti yer alıb.

Mətbu orqanın növbəti səhifələrində akademik Ramiz Mehdiyevlə müsahibə, AMEA prezidentinin Azərbaycanın elmi ictimaiyyəti adından dünya birliyinə, aparıcı beynəlxalq təşkilatların rəhbərlərinə müraciəti, həmçinin dünyanın bir sıra elmlər akademiyalarının və elmi mərkəzlərinin rəhbərlərinə ünvanladığı məktublar, eləcə də akademiya rəhbərliyinin Molekulyar Biologiya və Biotexnologiyalar İnstitutunun maddi-texniki bazası və burada yaradılan şəraitlə tanışlığı öz əksini tapıb.

Bundan əlavə, AMEA-nın elmi müəssisə və təşkilatlarının Silahlı Qüvvələrin Yardım Fonduna köçürdüyü vəsait, akademiklər İsmayıl Hacıyev, Fuad Əliyev, Nazim Məmmədov və AMEA-nın müxbir üzvü Bəxtiyar Məmmədovun ölkə başçısına ünvanladığı məktublar, rusiyalı alimlər Nəbiyula Qiçiev, Sergey Kirsanov və çinli alim Yang Jinin Azərbaycanın ərazi bütövlüyünü dəstəkləyən və Ermənistanın işğalçılıq siyasətini pisləyən açıqlamaları ilə tanış ola bilərsiniz.

Eyni zamanda, “XIX əsrin axırlarında İrəvan şəhərinin Azərbaycan mühiti və məhəllə adları”, “Azərbaycan arxeologiyasının fəaliyyət istiqamətlərinin təkmilləşdirilməsinə yeni baxış”, “Xocalının əsir abidələri” sərlövhəli məqalələr, Biofizika İnstitutunun direktoru, AMEA-nın müxbir üzvü Oktay Qasımovla müsahibə, yeni nəşrlər və digər xəbərlər də oxuculara təqdim olunur.

16 səhifəlik qəzetdə, o cümlədən rus dilində maraqlı yazılar da yer alıb.

© Mənbə: www.science.az

Azərbaycan Milli Elmlər Akademiyasının Əsas binası Azərbaycan bayrağı ilə bəzədilib

Ermənistan ordusunun təxribatlarına cavab olaraq Azərbaycan Prezidenti, Silahlı Qüvvələrin Ali Baş Komandanı İlham Əliyevin rəhbərliyi altında vətənimizin işğal edilmiş torpaqlarının azadlığı uğrunda aparılan hərbi əməliyyatlar və əldə olunan uğurlar hər bir vətəndaşımızda milli qürur və fəxarət hissi yaşadır.

Arxa cəbhədə xalqımızın müzəffər ordumuza yardımı, nümayiş etdirdiyi möhkəm birlik, həmrəylik və vətənə sevgi qələbəyə olan inamımızı gücləndirməkdədir.

Xalqımızın bu günlərdə yüksək vətənpərvərlik duyğularına dəstək olmaq, ordumuzla birlik nümayiş etdirmək məqsədilə Azərbaycan Milli Elmlər Akademiyasının Əsas binası Azərbaycan bayrağı ilə bəzədilib.

İnanırıq ki, şanlı bayrağımız tezliklə işğaldan azad ediləcək doğma torpaqlarımızda dalğalanacaq!

Qarabağ Azərbaycandır! Qələbə bizimlədir!

© Mənbə: www.science.az

Xaricdə yaşayan elm adamlarına AMEA-nın Riyaziyyat və Mexanika İnstitutunun etdiyi müraciətə gələn cavab məktubları

Sentyabr ayının 27-dən etibarən Erməni silahlı qüvvələrinin Azərbaycan ərazisinə, eyni zamanda mülki əhaliyə etdiyi hücumlar haqqında xaricdə yaşayan riyaziyyatçı alimlərə geniş məlumat verilmişdir. Həmin məktublara ABŞ-dan olan Boris Mordukhovich, Türkiyədə yaşayan Elimxan Mahmudov, Rusiyalı alimlər Andrey Fursikov, Elfat Qaleyev, İsraildən olan Yakov Yakubov, ABŞ-da yaşayan Faiq Nağıyev və başqa alimlərdən cavab gəlmişdir. Onlardan bəzilərini xəbərə yerləşdiririk.

© Bütün hüquqlar qorunur. Xəbərlərdən istifadə edərkən www.imm.az saytına istinad zəruridir.

“Elm” qəzetinin “Qarabağ Azərbaycandır!” şüarı ilə yeni sayı çap olunub

AMEA Rəyasət Heyətinin həftəlik mətbu orqanı olan “Elm” qəzetinin “Qarabağ Azərbaycandır!” şüarı ilə cari ildə 16-cı nömrəsi işıq üzü görüb.

Qəzetin ilk səhifəsində Prezident İlham Əliyevin Türkiyə Respublikasının Xarici İşlər naziri Mövlud Çavuşoğlunun başçılıq etdiyi nümayəndə heyəti ilə görüşü, həmçinin Azərbaycan Respublikası Nazirlər Kabinetinin qərarları yer alıb.

Mətbu orqanın növbəti səhifələrində AMEA Rəyasət Heyətinin iclası, akademiyanın elmi müəssisə və təşkilatlarının Silahlı Qüvvələrin Yardım Fonduna köçürdüyü vəsait, eləcə də akademiklər Dilqəm Tağıyev, Rasim Əliquliyev, İsmayıl Hacıyev, Teymur Kərimli, AMEA-nın müxbir üzvü Əbülfəz Quliyev, AMEA Yap ərazi təşkilatının sədri, biologiya üzrə fəlsəfə doktoru, dosent Ulduzə Qurbanova, AMEA-nın Qadınlar Şurası, Gürcüstan Elmlər Akademiyasının akademiki Vladimer Papava, türkiyəli professor Abdullah Avey, alman tarixçi Mixael Raynhard və digərlərinin Azərbaycan Ordusuna dəstək məqaləsi və bəyanatı öz əksini tapıb.

Bundan əlavə, Kənd Təsərrüfatı Nazirliyində AMEA-nın institutları tərəfindən təqdim olunan layihələrin müzakirəsi, “Cənubi Qafqaz. 1903-cü il” xəritəsi: ermənilərin toponimik aqresiyalarını arqument kimi ifşa edən tarixi-coğrafi xəritələr”, “Dağlıq Qarabağ: burada nə baş verir?” sərlövhəli məqalələr, yeni nəşrlər, 2020-ci il Nobel laureatları və elanlarla tanış ola bilərsiniz.

12 səhifəlik qəzetdə, o cümlədən rus dilində maraqlı yazılar da yer alıb.

© Mənbə: www.science.az

AMEA-nın Riyaziyyat və Mexanika İnstitutunun alimləri dünyanın müxtəlif ölkələrində çalışan riyaziyyatçı alimlərlə daim əlaqə saxlayır. Onlar son günlərdə Ermənistan – Azərbaycan – Dağlıq Qarabağ cəbhəsində baş verən hadisələrlə bağlı obyektiv hazırlanmış məlumatı 60-dan çox müxtəlif millətlərdən olan alimlərə çatdırmışlar

Ermənistan – Azərbaycan – Dağlıq Qarabağ münaqişəsi haqqında qarşı tərəfdən mediyada aramsız olaraq dezinformasiya xarakterli məlumatlar yayılır. Bunu nəzərə alaraq, Sizə ancaq bəzi faktlara söykənən doğru məlumatları çatdırmaq istəyirik.

Məlumdur ki, 1988-ci ildən başlayaraq Ermənistanda yaşayan 250 minə yaxın azərbaycanlı öz ata-baba yurdlarından qovulmuş, Ermənistanın Azərbaycana qarşı ərazi iddiaları nəticəsində baş vermiş Ermənistan – Azərbaycan – Dağlıq Qarabağ münaqişəsi nəticəsində bir milyona yaxın Azərbaycan vətəndaşı öz ölkəsində məcburi köçkün olmuşdur. Bu münaqişə nəticəsində on minlərlə günahsız insan qətlə yetirilmişdir.

Birləşmiş Millətlər Təşkilatının hələ 1993-cü ildə qəbul etdiyi 822, 853, 874, 884 saylı dörd qətnamədə Erməni Ordusunun Dağlıq Qarabağ və onun ətrafındakı yeddi rayondan dərhal, tam və qeyd-şərtsiz çıxarılması tələbi öz əksini tapmışdır. Lakin Ermənistan tərəfi 30 il ərizəndə bu qətnaməyə və beynəlxalq ictimaiyyətin iradəsinə məhəl qoymamış və öz işğalçılıq siyasətini davam etdirmişdir. Ermənistanın baş naziri N.Paşinyan ATƏT-in Minsk qrupunun vasitəçiliyi ilə aparılan danışıqlıqlar prosesinin format və məzmunununu pozmağa cəhd göstərərək, aparılan danışıqlıqlara ciddi zərbə vurmuş və praktik olaraq münaqişənin həlli prosesini çıxılmaz vəziyyətə gətirmişdir. Ermənistanın son zamanlar Azərbaycanın işğal olunmuş ərazilərində həyata keçirdiyi hərbi əməliyyatlar Azərbaycana öz mülki şəxslərinin təhlükəsizliyini təmin etmək üçün ərazisi daxilində və beynəlxalq humanitar hüquq çərçivəsində özünü müdafiə etmək məqsədilə qanunu əks hücum əməliyyatlarına məcbur olmuşdur.

Sizə məlumat vermək istəyirəm ki, bu ilin sentyabrın 27-dən başlamış və bu gün də davam edən Ermənistanın hərbi təxribatı nəticəsində təmas xətti boyunca yerləşən hərbi birləşmələrimizin mövqeyləri və yaşayış ərazilərimiz ağır artileriya atəşinə məruz qalmışdır. Nəticədə hərbi qulluqçularımız, içərilərində qadın və körpələrin olduğu 30 nəfərdən artıq mülki şəxsi qətlə yetirmiş, 200 nəfərdən çoxu yaralanmış, 900-dən artıq evə ziyan dəymiş və ya təmamilə dağıdılmışdır. Cənubi Qafqazda ən böyük su elektrik stansiyasının yerləşdiyi Mingəçevir şəhəri raket atəşinə məruz qalmış, Gəncə, Naftalan şəhərləri, Ağcabədi, Beyləqan, Tərtər, Bərdə, Yevlax və həttə münaqişə bölgəsindən 300 km məsafədə yerləşən Xızı və Abşeron rayonlarına orta mənzilli raketlər atılmış, mülki infrastruktura daxil olan onlarla xəstəxana, məktəb və uşaq bağçaları dağıdılmışdır.

Azərbaycan tərəfi uğurlu əks hücum əməliyyatları keçirərək, işğal olmuş torpaqlarımızın bir hissəsini işğaldan azad etmişdir.

Son günlər cəbhə bölgəsində ciddi döyüşlər davam edir, şanlı Azərbaycan Ordusu öz ədalətli missiyasını uğurla həyata keçirərək xalqımızın qələbə tarixinə yeni səhifələr yazır.

Qarabağ Azərbaycandır!

© Bütün hüquqlar qorunur. Xəbərlərdən istifadə edərkən www.imm.az saytına istinad zəruridir.