İyulda Tovuz rayonu istiqamətindəki hücumlardan sonra, ermənilər sentyabrın 27-dən etibarən cəbhə xətti boyunca da ardıcıl həmlələr edərək Azərbaycan ərazi bütövlüyünü və əhalisini hədəf aldılar. Lakin görünən mənzərə odur ki, erməni hərbi təxribatı aldığı dəhşətli cavabdan çətin ki, özünə gələ bilsin.

Bu fikirləri AMEA Gənc Alimlər Şurasının üzvü, mexanika-riyaziyyat üzrə fəlsəfə doktoru Emin Bağırov deyib.

Alim qeyd edib ki, Azərbaycan ərazisi otuz ilə yaxındır ki, işğala məruz qalıb. Milyondan artıq qaçqın və məcburi köçkünlərimiz öz doğma yurdlarından didərgin düşüb. Ermənilər konstruktiv yol axtarmaqdan, danışıqlar mərhələsinə hörmətlə yanaşmaqdan “Dağlıq Qarabağ” münaqişəsini süni şəkildə uzatmaq, Azərbaycanı təhdid etmək yolunu tutdular. Nikol Paşinyan “Qarabağ Ermənistandır nöqtə!” deməsi, müdafiə naziri D.Tonoyanın bədnam açıqlamaları, qondarma rejimin rəhbərinin inauqurasiyasının qədim Şuşa şəhərimizdə keçirilməsi əsəblərimizi tarıma çəkmişdi. Daha doğrusu, otuz ilə yaxın bir müddətdə torpaqlarımızın yadelli işğalçıların tapdağı altında qalması  və bu müddət ərzində bütün siyasi danışıqların nəticə verməməsi Azərbaycan xalqını və hökümətini narahat etməyə bilməzdi. Bu baxımdan, erməni təxribatlarına son qoymaq, hücumların qarşısını almaq üçün hərəkətə keçən şanlı Azərbaycan ordusu düşməni sarsıdıcı itkilərə məruz qoymuşdur.

E.Bağırov bildirib ki, cənab Prezidentin Rossiya-1 telekanlanında yayımlanan “60- dəqiqə” proqramına verdiyi müsahibədə Azərbaycanın haqq səsini faktlarla ortaya qoyması və münaqişənin mahiyyəti, ermənilərin işğal və təxribatları barədə aparıcların suallarını sistemli şəkildə cavablandırması cəmiyyətimizdə sevinclə qarşılandı.  Ermənistan baş naziri N.Paşinyanın  həmişəki tərzinə sadiq qalaraq öz xislətini ortaya qoyması, yalan, böhtan dolu  şərhlər verməsi isə təəccüblü olmadı. Çünki dünya bu həqiqətləri yaxşı bilir. Bundan əlavə, beynəlxalq hüquq da Azərbaycan ərazi bütövlüyünü dəstəkləyir.

Hazırda ölkə boyu bütün səfərbərlik orqanlarına  gənclərimizin könüllü axın etməsi onu göstərir ki Azərbaycan xalqı heç bir zaman torpaqlarının işğalı ilə barışmaq fikri yoxdur. Son 5 gün ərzində baş verənlər isə Ali Baş Komandanımızın prinsipiallığını, qətiyyətini və ordumuzun açıq-aşkar qüdrətini ortaya qoyur.

“Xalq qəzeti”

Azərbaycan-Türkiyə münasibətlərinin minilliklərdən gələn böyük tarixi, davamlı və dayanaqlı ənənələri vardır. “Torpağı əkməsən qorumağa, qorumasan əkməyə dəyməz” deyən ulu Dədə Qorqudun vəsiyyətləri Azərbaycan üçün olduğu kimi, qardaş Türkiyə üçün də eyni dərəcədə müqəddəsdir.

Dünya şöhrətli görkəmli dövlət xadimi Heydər Əliyevin Azərbaycan-Türkiyə münasibətlərinin mahiyyəti və əhəmiyyəti haqqında böyük müdriklik və uzaqgörənliklə dediyi “Tək millət, iki dövlət” kəlamları hər iki ölkədə atalar sözü kimi qəbul olunur.

Azərbaycan Respublikasının Prezidenti İlham Əliyevlə Türkiyə Cümhuriyyətinin Cümhurbaşkanı Rəcəb Tayyib Ərdoğanın həyata keçirdikləri qətiyyətli və məqsədyönlü siyasət rəhbərlik etdikləri ölkələrin milli və dövlətçilik maraqlarını dəqiq ifadə etməklə bərabər, həm də bütün dünyanın ciddi ehtiyacı olduğu qarşılıqlı etimadın, birlik və həmrəyliyin gerçək örnəklərinin planetimizə ən açıq və aydın şəkildə təqdim olunmasına xidmət edir.

Müstəqil Azərbaycan dövləti və Türkiyə Cümhuriyyəti həqiqətən ölkələrimizin milli və dövlətçilik maraqları qədər regionda və ümumən dünyada sülhün, təhlükəsizlik və əməkdaşlığın inkişaf etdirilməsini gerçək şəkildə öz ölkəsinin dövlət strategiyasının ana maddələrinə çevirmişdir. Bu yalnız iki xalqın yox, bütövlükdə bəşəriyyətin xeyrinədir. Azərbaycan və Türkiyə həmrəyliyi və əməkdaşlığı bizim ölkələrimiz qədər də dünya birliyinin şansıdır. Türkiyə və Azərbaycanın olduğu yerdə dünyamız qarşılıqlı etimaddan, qardaşlıqdan, birlik və həmrəylikdən heç nigaran qalmayıb, fərqli qitələrdə və materiklərdə çətinlik və böhran olan yerlərdə həmrəylik uğrunda arxayın mübarizə apara bilər.

Türkiyə Cümhuriyyətinin müstəqil Azərbaycan Respublikasının ölkəmizin əzəli torpaqları və ayrılmaz bir parçası olan Dağlıq Qarabağ uğrunda erməni işğalına və təxribatına qarşı apardığı mübarizədə, özünümüdafiə tədbirlərində müstəqil dövlətimizin və xalqımızın haqq işini müdafiə etməsi qədim tarixə malik ortaq milli-mənəvi və dini dəyərlərimizə ehtiram əlaməti olmaqdan başqa, həm də uydurma ikili standartların yox, ədalətin qələbə çalmasına dəstək verməyin əsl xidmətin ifadəsidir. Dünya birliyi artıq bilməmiş deyildir ki, Azərbaycan da qardaş Türkiyəyə münasibətdə eyni addımları atmaqla sülhü, həmrəyliyi və ədaləti müdafiə etməyin daha bir nümunəsini göstərməklə yer kürəsini düşündürmək vəzifəsini həyata keçirməyi dərk olunmuş məqbul yol sayır.

Dağlıq Qarabağ uğrunda erməni işğalçılarına qarşı mübarizədə Türkiyə Cümhuriyyətinin ürəkdən gələn etibarlı qardaş sözü hər cür silahlı müdafiədən qat-qat üstündür. Döyüş meydanlarında işğalçı Ermənistanın layiqli dərsini verməyi bacaran Azərbaycan üçün qardaş Türkiyənin gerçək mənəvi dəstəyi hərbi-iqtisadi köməyindən də əhəmiyyətlidir. Ən önəmlisi ondan ibarətdir ki, Azərbaycan və Türkiyə qoşa dəmir yolunun üstündə dünya birliyinə, sülh və əməkdaşlığa, qardaşlıq və həmrəyliyə doğru dönmədən irəliləyən lokomotivdir.

İşğalçı Ermənistanın Dağlıq Qarabağ ətrafında gedən döyüşlərdə Türkiyə əsgərlərinin iştirak etməsi haqqında yaydığı yalan bəyanatlar qətiyyən reallığı əks etdirmir. Təcavüzkar Ermənistanın Azərbaycan cəbhə xəttində Türkiyə faktoru ilə əlaqədar uydurduğu yanlış informasiyalar bir neçə mərkli məqsədə xidmət edir:

– Azərbaycan ordusunda Türkiyə amili haqqında yalançı mif uydurmaqla özünün ümid etdiyi digər dövlətlərin Ermənistana dəstək verməsinə cəlb etməyə çalışır.

– Bununla Ermənistan Livandan, Suriyadan və İraqdan gətirib zorla müharibəyə cəlb etdiyi artıq təsdiq olunmuş muzdlu yaraqlıları gizlətmək, diqqətdən yayındırmaq istəyir.

– Növbəti dəfə də təklənmiş, “yalançı və yazıq erməni” donuna girib, bəzi dövlətləri aldadaraq maddi və mənəvi yardım almağa can atır.

– Heç olmazsa, hələlik də olsa, yalan və şantaj yolu ilə Şərqi Anadolu torpaqlarına göz dikdiyini arxa plana keçirməklə ikinci cəbhə açılmaq təhlükəsindən yan keçməyə səy göstərir.

– Nəhayət, Türkiyə xofu qarşısında aciz və miskin olduqlarını gizlədir, qorxusunu və vahiməsini ört-basdır etmək görüntüsü yaradır.

– Azərbaycanın ədalətli mübarizəsinə kölgə salmağa, bu məsələ ətrafında uydurma qalmaqal yaratmağa, aranı qarışdırmağa cidd-cəhd göstərir.

– 27 sentyabr 2020-ci il Dağlıq Qarabağ döyüşlərində Ali Baş Komandan İlham Əliyevin rəhbərliyi ilə qazanılan böyük hərbi zəfərləri, uğurlu gedişləri təhrif etməyə çalışır.

– Bununla Paşinyan rejimi öz xalqını aldadır, özünü yalandan sığortalayır.

Buna baxmayaraq, artıq Azərbaycanın döyüş cəbhəsində qazandığı zəfərlər, doğma torpaqlarımızı azad etmək istiqamətində əldə etdiyi ciddi mövqelər yalançı Paşinyan rejiminin bütün niyyətlərinin uydurma və böhtandan ibarət olduğunu dünya ictimaiyyəti əyani surətdə görür. Buna görədir ki, indi dünyanın bir çox ölkələri Azərbaycanın haqq işini dəstəkləyir və müdafiə edir.

Ona görə də Azərbaycan-Türkiyə münasibətləri, ortaq tarixi köklər, milli-mənəvi dəyərlər və habelə qarşılıqlı etimad və əməkdaşlıq əsasında dönmədən inkişaf edərək, ölkələrimizdə, regionda və dünyada sülh və təhlükəsizliyin, birlik və həmrəyliyin, ədalət və əməkdaşlığın inkişaf etdirilməsinə real təminat və töhfələr verən, daha böyük inkişafa xidmət edən dövlətlərarası qardaşlıq və əməkdaşlıq modeli kimi qəbul olunur.

XX əsrdə Türkiyə Cümhuriyyəti – dünyanın böyük güc və söz sahiblərindən biridir. Azərbaycan da qısa müddətdə – müasir epoxanın yeni liderlərindən birinə çevrilmişdir.

Azərbaycan-Türkiyə dünyada bütün istiqamətlər üzrə vahid mövqedən çıxış etməyin, daim iş birliyində olmağın, dünyaya sülh və barış gətirməyin nümunəsidir.

Bu gün Azərbaycan səngərində türk əsgərinin olmasına xüsusi bir ehtiyac yoxdur. Azərbaycan Respublikasının Prezidenti İlham Əliyevin illərdən bəri ölkəmizdə apardığı ardıcıl və uğurlu ordu quruculuğu siyasəti və aşıladığı azərbaycançılıq idealı Azərbaycan əsgərinin böyük qələbəyə doğru inamla getməsi üçün hər cür təminat yaratmışdır. Ancaq bununla da fəxr etmək olar ki, dünyada Azərbaycanın öz torpaqlarını düşmən işğalından azad etmək uğrunda apardığı ədalətli mübarizəni dönmədən müdafiə edən, xalqımız və dövlətimizlə təbii bir həyəcanı yaşayıb, məsuliyyət duyğularını bölüşən Türkiyə Cümhuriyyəti və səksən iki milyonluq türk xalqı vardır. Türkiyənin özü yox, etibarlı qardaş sözü, mənəvi dəstəyi ön cəbhədə Azərbaycan əsgəri ilə bir səngərdədir və ordumuzu qələbəyə ruhlandırmağa xidmət edir.

Ürəkdən inanırıq ki, ən yaxın zamanlarda Azərbaycan Respublikasının Prezidenti, Ali Baş Komandanımız İlham Əliyevin rəhbərliyi ilə şanlı dövlət bayrağımız Şuşa şəhərində dalğalandığı günü Azərbaycan və Türkiyə bu böyük qələbə bayramının hərbi paradının və şənliklərinin sevincini birlikdə yaşayacaqdır.

İsa Həbibbəyli, AMEA-nın birinci vitse-prezidenti, Milli Məclisin deputatı, akademik

© Mənbə: www.science.az

Sentyabrın 29-da Azərbaycan Milli Elmlər Akademiyasının (AMEA) Rəyasət Heyətinin növbəti iclası keçirilib.

İclasda AMEA-nın prezidenti, akademik Ramiz Mehdiyev, Rəyasət Heyətinin üzvləri – AMEA-nın birinci vitse-prezidentləri, akademiklər İsa Həbibbəyli və İbrahim Quliyev, AMEA-nın vitse-prezidentləri, akademiklər Tofiq Nağıyev, Dilqəm Tağıyev, İradə Hüseynova, Rasim Əliquliyev, akademiyanın akademik-katibi, AMEA-nın müxbir üzvü Əminağa Sadıqov, Rəyasət Heyətinin üzvü vəzifəsini icra edənlər – akademiklər Cəmil Əliyev və Gövhər Baxşəliyeva iştirak ediblər.

Tədbiri AMEA-nın prezidenti, akademik Ramiz Mehdiyev açaraq sentyabrın 27-də səhər saatlarından etibarən Ermənistan silahlı qüvvələrinin təxribata əl ataraq cəbhəboyu ərazidə yerləşən Azərbaycan kəndlərini, həmçinin ordumuzun mövqelərini intensiv atəşə tutduğunu söyləyib. Qeyd edib ki, bu təxribata cavab olaraq Azərbaycan Silahlı Qüvvələri Ali Baş Komandan İlham Əliyevin əmrilə işğalçı Ermənistana qarşı bütün cəbhə boyu genişmiqyaslı əks-hücum əməliyyatına başlayıb, endirilən sarsıdıcı zərbələr nəticəsində düşmən çox sayda canlı qüvvə və texnika itirərək geri çəkilmək məcburiyyətində qalıb, 7 kəndimiz, həmçinin strateji əhəmiyyətə malik yüksəkliklər erməni qəsbkarlarından təmizlənib.

Akademik Ramiz Mehdiyev sentyabrın 27-də Təhlükəsizlik Şurasının iclasında Prezident İlham Əliyevin ordumuzun qazandığı uğurları haqlı olaraq ciddi hərbi qələbə kimi səciyyələndirərək, xalqımızı təbrik etdiyini söyləyib. Vurğulayıb ki, bu parlaq qələbə heç şübhəsiz ki, Azərbaycan Respublikasının Prezidenti cənab İlham Əliyevin yürütdüyü qətiyyətli siyasətin və nail olduğu yüksək ordu quruculuğunun nəticəsidir. Həmçinin bildirib ki, Prezident İlham Əliyev BMT Baş Assambleyasının 75-ci sessiyasında çıxışı zamanı, eləcə də dünyanın bir çox aparıcı dövlətlərinin rəhbərləri ilə görüşündə Ermənistanın işğalçı siyasətindən, regional sülhə və təhlükəsizliyə böyük təhdid təşkil etməsindən, o cümlədən Azərbaycanın haqlı mübarizəsindən danışıb.

Akademik Ramiz Mehdiyev bu gün Azərbaycan Silahlı Qüvvələrinin bölgənin ən qüdrətli ordusu olduğunu və hərbçilərimizin qısa zamanda ölkəmizin ərazi bütövlüyünü bərpa etməyə, işğalçılara tutarlı cavab verməyə qadir olduğunu bildirib, xalqımızın Prezidentimizin, dövlətimizin və ordumuzun apardığı haqlı mübarizəni ürəkdən dəstəklədiyini söyləyib.

AMEA prezidenti, həmçinin “Azərbaycan Respublikasının ərazisində elan edilmiş hərbi vəziyyətlə əlaqədar” Nazirlər Kabineti tərəfindən dövlət müəssisələrində növbətçiliyin təşkili ilə bağlı müvafiq qərarın qəbul edildiyini və bu istiqamətdə akademiyada da tədbirlərin görüləcəyini diqqətə çatdırıb.

Daha sonra akademik Ramiz Mehdiyev iclasın gündəliyi barədə iştirakçılara məlumat verib.

AMEA-nın akademik-katibi, akademiyanın müxbir üzvü Əminağa Sadıqov müzakirəyə çıxarılan ilk məsələnin AMEA-nın “Elm və Texnologiya Parkı” MMC-də audit yoxlamasının nəticələri haqqında olduğunu deyib.

Mövzu ilə əlaqədar çıxış edən AMEA Rəyasət Heyətinin Daxili nəzarət və audit şöbəsinin müdiri Vidadi Baxşəliyev bildirib ki, “AMEA Yüksək Texnologiyalar Parkının mövcud vəziyyəti və problemlər haqqında” AMEA Rəyasət Heyətinin 15 may 2020-ci il tarixli Qərarında nəzərdə tutulan bəndlər üzrə tapşırıqların icra vəziyyəti ilə bağlı AMEA Rəyasət Heyətinin bir qrup vəzifəli şəxsləri tərəfindən AMEA YT Parkda yoxlama həyata keçirilib, lakin bəzi səbəblərdən Qərarın müvafiq bəndlərinin icrasının təmin edilmədiyi aşkarlanıb. Diqqətə çatdırılıb ki, bunun başlıca səbəbi 19 sentyabr 2017-ci il tarixdən AMEA YT Parkın rezidenti olan “Elm və Texnologiya Parkı” MMC-nin və digər rezidentlərin (“Azeltech” MMC, “DN Technologies” MMC) üzərinə düşən öhdəliklərini lazımınca icra etməməsidir. Vidadi Baxşəliyev sözügedən Qərarın 3-cü bəndinə əsasən, o cümlədən 17 may 2017-ci il tarixli üçtərəfli Girov müqaviləsi əsasında “AMEA Yüksək Texnologiyalar Parkı” MMC-yə, həmçinin AMEA YTP-də fəaliyyətin həyata keçirilməsinə dair bağlanmış rezidentlik müqaviləsinə əsasən “Elm və Texnologiya Parkı” MMC-yə müəyyən tapşırıqların verildiyini, lakin MMC tərəfindən bu tapşırığın qismən icra olunduğunu söyləyib.

Şöbə müdiri, həmçinin AMEA YT Parkın 6 noyabr 2017-ci il tarixdən rezidenti statusunu əldə etmiş “DN Technologies” MMC-nin layihəsini həyata keçirməsi üçün AMEA İşlər İdarəsinin sabiq müdiri tərəfindən verilən göstərişə əsasən, “AMEA Yüksək Texnologiyalar Parkı” MMC ilə “DN Technologies” MMC arasında  19 aprel  2018-ci il tarixli Tərəfdaşlıq Müqaviləsinin bağlandığını bildirib.

Yoxlamalar zamanı, həmçinin müəyyənləşdirilib ki, AMEA YT Parkın digər rezidenti “Azeltech” MMC və “DN Technologies” MMC indiyə qədər bütün layihələrini “Elm və Texnologiya Parkı” MMC adı ilə həyata keçirib, bağlanmış müqavilələrin hamısı “Elm və Texnologiya Parkı” MMC adı ilə rəsmiləşdirilib. Bu isə bir daha sübut edir ki, “Elm və Texnologiya Parkı” MMC öz “məqsədyönlü” fəaliyyətini bu kimi adları sadalanan rezident hüquqi şəxslər vasitəsilə reallaşdırmağa davam etdirib.

Vidadi Baxşəliyev bildirib ki, “Elm və Texnologiya Parkı” MMC-də AMEA prezidentinin 29 iyul 2020-ci il tarixli sərəncamı əsasında AMEA Rəyasət Heyəti Aparatının Daxili nəzarət və audit şöbəsi tərəfindən aparılmış audit yoxlaması zamanı hüquq pozuntuları aşkarlanıb. Belə ki, audit yoxlaması zamanı məlum olub ki, “Elm və Texnologiya Parkı” MMC-nin fəaliyyəti dövründə bağlanmış bir sıra müqavilələrdə və onların icrasında ciddi pozuntulara yol verilib.

Bununla yanaşı, “Elm və Texnologiya Parkı” MMC-nin kadr məsələlərinin idarə edilməsində nöqsanların olduğu müəyyən edilib.

Sonra AMEA Rəyasət Heyətinin Daxili nəzarət və audit şöbəsinin müdir müavini Mehparə Kəlbəliyeva “Elm və Texnologiya Parkı” MMC tərəfindən alınan avadanlıqlar barədə məlumat verib və mövcud çatışmazlıqlardan danışıb.

Hesabat ətrafında AMEA-nın vitse-prezidenti, akademik Rasim Əliquliyev, AMEA İşlər idarəsinin müdiri, professor Elton Məmmədov, Hüquq və kadrlar idarəsinin rəisi, hüquq üzrə fəlsəfə doktoru Rasim Ağasiyev, “AMEA Yüksək Texnologiyalar Parkı” MMC-nin direktoru Vasif Abbasov, “Elm və Texnologiya Parkı” MMC-nin direktoru Cavid Şahmuradov, “DN Technologies” MMC-nin direktoru Ceyhun Nabadov və  Radiasiya Problemləri İnstitutunun baş mühəndisi Samir Süleymanov çıxış edərək fikir və təkliflərini səsləndiriblər.

AMEA Rəyasət Heyəti yuxarıda qeyd olunan problemləri nəzərə alaraq “Elm və Texnologiya Parkı” MMC-nin fəaliyyətinə dair bir sıra qərarlar qəbul edib.

Daha sonra akademik Ramiz Mehdiyev çıxış edərək bu gün AMEA-nın elmi müəssisə və təşkilatlarında bir sıra ciddi uğurlu tədqiqatların aparıldığını və mühüm elmi nəticələrin əldə edildiyini diqqətə çatdırıb. Qeyd edib ki, bu elmi nəticələrin cəmiyyətimizdə və beynəlxalq müstəvidə təbliği istiqamətində ardıcıl işlər aparılmalıdır. Bundan əlavə, akademik bu gün alimlərimizin sağlam, məsuliyyətli və işgüzar prinsiplər əsasında çalışmasının və AMEA Rəyasət Heyətinin qərarlarının həyata keçirilməsinə öz töhfələrini verməsinin zəruriliyini vurğulayıb.

Sonda iclasda bir sıra cari məsələlər müzakirə olunub.

© Mənbə: www.science.az

Azərbaycan Respublikasının Prezidenti, Ali Baş Komandan İlham Əliyevin cəbhə bölgəsində ermənilərin təxribatı nəticəsində yaranmış vəziyyətlə əlaqədar müraciəti müstəqil dövlətimizin və xalqımızın haqq sözünün ifadəsidir.

Bu sözləri AMEA-nın birinci vitse-prezidenti, akademik İsa Həbibbəyli deyib.

Akademik söyləyib ki, qəhrəman Azərbaycan Ordusunun tarixi torpaqlarımızın düşməndən azad olunması uğrunda apardığı mübarizə obyektiv reallığın ifadəsi və haqq işidir: “Arzu edirik ki bu, Azərbaycan xalqını böyük qələbəyə çatdıran son döyüş olsun. İndiki məsuliyyətli günlərdə ölkəmizin Prezidenti, Ali Baş Komandanımız İlham Əliyevin ətrafında möhkəm surətdə birləşmək, qəhrəman ordumuza hərtərəfli dəstək vermək müqəddəs borcumuzdur. Xalqımız ürəkdən inanır ki, Prezident İlham Əliyevin apardığı ədalətli və qətiyyətli siyasət qalib gələcəkdir. Nida işarəsi”.

“AzərTac”

Məlum olduğu kimi, 27 sentyabr 2020-ci il tarixində səhər saatlarında Ermənistan silahlı qüvvələri təxribata əl ataraq cəbhəboyu ərazidə yerləşən Azərbaycan kəndlərini, həmçinin ordumuzun mövqelərini intensiv atəşə məruz qoymuşlar. Dinc sakinlər və hərbi qulluqçular arasında itkilərə gətirib çıxaran bu təxribata cavab olaraq Azərbaycan Silahlı Qüvvələri Ali Baş Komandan İlham Əliyevin əmrilə işğalçı Ermənistana qarşı bütün cəbhə boyu genişmiqyaslı əks-hücum əməliyyatına başlamışlar. Qəhrəman Azərbaycan Ordusunun əzmi və şücaəti nəticəsində Füzuli rayonunun işğal altında olan 6, Cəbrayılın isə 1 kəndi erməni qəsbkarlarından təmizlənmişdir. Həmçinin Müdafiə Nazirliyinin rəsmi məlumatına əsasən, ordumuz Ağdərə istiqamətində də əminliklə irəliləyərək, strateji əhəmiyyətə malik mövqeləri öz nəzarətinə götürmüşdür. Döyüş əməliyyatlarının gedişində erməni ordusuna endirilən sarsıdıcı zərbələr nəticəsində, düşmən çox sayda canlı qüvvə və texnika itirərək geri çəkilmək məcburiyyətində qalmışdır. Təsadüfi deyil ki, Təhlükəsizlik Şurasının iclasında Prezident İlham Əliyev ordumuzun qazandığı uğurları haqlı olaraq ciddi hərbi qələbə kimi səciyyələndirərək, xalqımızı təbrik etmişdir.

Bu parlaq qələbə heç şübhəsiz ki, Azərbaycan Respublikasının Prezidenti cənab İlham Əliyevin yürütdüyü qətiyyətli siyasətin və nail olduğu yüksək ordu quruculuğunun nəticəsidir. Dövlət başçısı bir daha sübut etdi ki, Azərbaycan Silahlı Qüvvələri həqiqətən də bölgənin ən qüdrətli ordusudur və hərbçilərimiz qısa zamanda ölkəmizin ərazi bütövlüyünü bərpa etməyə, işğalçılara tutarlı cavab verməyə qadirdirlər.

Ölkə başçısı cənab İlham Əliyevi və xalqımızı əmin edirik ki, Azərbayvan Milli Elmlər Akademiyasının kollektivi hər zaman olduğu kimi bu həyəcanlı, məsuliyyətli və şərəfli anlarda da möhtərəm Prezidentimizin, dövlətimizin və ordumuzun apardığı haqlı mübarizəni ürəkdən dəstəkləyir və müdafiə edir. Erməni təxribatı nəticəsində dünyasını dəyişən vətəndaşlarımıza Allahdan rəhmət, yaralılara şəfa diləyirik, ordumuzdan isə yeni zəfər müjdələri gözləyirik.

Cəbhədən gələn hər növbəti qələbə xəbəri bütün azərbaycanlılar kimi Azərbaycan Milli Elmlər Akademiyasının əməkdaşlarında da böyük qürur hissi oyatmış, vətənpərvərlik duyğularını qüvvətləndirmişdir. Azərbaycan əsgərinin tezliklə qələbə bayrağını Şuşaya, Xankəndiyə sancmaqla tarixi ədaləti bərpa edəcəyinə hər bir Azərbaycan vətəndaşı kimi alimlərimiz də ürəkdən əmindirlər. İşğal altındakı torpaqlarımızın düşmən tapdağından azad ediləcəyi günü hamımız səbirsizliklə gözləyir, bu günün o qədər də uzaqda olmadığına bütün varlığımızla inanırıq.

© Mənbə: www.science.az

Sentyabrın 25-də Azərbaycan Milli Elmlər Akademiyası Rəyasət Heyətinin növbəti iclası keçirilib.

Tədbiri giriş sözü ilə açan AMEA-nın prezidenti, akademik Ramiz Mehdiyev iclasın gündəliyində yer alan bir sıra elmi-təşkilati və kadr məsələləri haqqında məlumat verib. Akademik Ramiz Mehdiyev bildirib ki, iclasda AMEA Rəyasət Heyətinin kadr potensialının gücləndirilməsi, müasir qloballaşma şəraitində virtual mühitdə milli kontentin inkişaf etdirilməsi, xalqımızın tarixi, ədəbi, mədəni irsinin qorunub saxlanılması və geniş təbliği, prioritet və aktual elmi istiqamətlər üzrə kompleks proqramların qəbul edilməsi, dünyanın nüfuzlu qurumları ilə qarşılıqlı elmi əməkdaşlıq kontekstində bir sıra beynəlxalq tədbirlərin keçirilməsi, AMEA-nın elmi müəssisələrinin strukturunun və elmi kadr hazırlığı sisteminin daha da təkmilləşdirilməsi, görkəmli alimlərin yubileylərinin qeyd edilməsi kimi məsələlərin müzakirəsi nəzərdə tutulur.

Gündəlikdə yer alan məsələlərin müzakirəsindən əvvəl Azərbaycan Respublikasının Prezidenti cənab İlham Əliyevin müvafiq sərəncamları ilə təltif olunmuş görkəmli alimlərə mükafatlar təqdim olunub. AMEA-nın prezidenti, akademik Ramiz Mehdiyev akademik Fəxrəddin Qədirova “Əməkdar elm xadimi” fəxri adının vəsiqəsini və döş nişanını, AMEA-nın müxbir üzvü Şahbaz  Muradova  “Azərbaycan Respublikası Prezidentinin Fəxri diplomu”nu və eləcə də AMEA-nın Fəxri fərmanını təqdim edib.

İclasda AMEA Rəyasət Heyətinin qərarı ilə tibb sahəsi üzrə görkəmli alim-onkoloq, Azərbaycan Respublikası Səhiyyə Nazirliyinin Milli Onkologiya Mərkəzinin baş direktoru, akademik Cəmil Əliyev və AMEA Şərqşünaslıq İnstitutunun direktoru, görkəmli şərqşünas alim, akademik Gövhər Baxşəliyeva AMEA Rəyasət Heyətinin üzvü vəzifəsini icra edən təyin ediliblər.

Sonra söz AMEA-nın akademik-katibi, müxbir üzv Əminağa Sadıqova verilib. O, gündəlikdə yer alan məsələlərlə iclas iştirakçılarını tanış edib. Akademik-katib bildirib ki, iclasda müzakirəsi nəzərdə tutulan məsələlər müasir şəraitdə akademiyanın strukturunun və idarəetməsinin təkmilləşdirilməsi, kadr potensialının gücləndirilməsi, beynəlxalq elmi əməkdaşlıq əlaqələrinin inkişafı, görkəmli Azərbaycan alimlərinin elmi nailiyyətlərinin və elmin təbliği baxımından mühüm əhəmiyyətə malikdir.

AMEA-nın müxbir üzvü Əminağa Sadıqov bildirib ki, iclasda müzakirəsi nəzərdə tutulan ilk elmi-təşkilati məsələ AMEA Rəyasət Heyəti aparatının strukturuna dair bəzi təkliflər haqqındadır. Məsələ ilə bağlı çıxış edən AMEA-nın vitse-prezidenti, akademik Rasim Əliquliyev bildirib ki, AMEA Rəyasət Heyətinin struktur bölmələrini özündə birləşdirən, onların cari işini təşkil edən və AMEA-nın elmi müəssisə və təşkilatlarının fəaliyyətini öz səlahiyyətləri daxilində əlaqələndirən AMEA Rəyasət Heyətinin aparatı qarşısında həm akademiya, həm də respublika miqyasında elmi və elmi-təşkilati proseslərin idarə olunması baxımından mühüm vəzifələr dayanır. Ona görə də onun təşkilati strukturunun, kadr potensialının, vəzifə və funksiyalarının müəyyənlədirilməsində akademik və kollegial idarəetmə prinsipləri, o cümlədən mütərəqqi beynəlxalq təcrübə əsas götürülməlidir. Akademik Rasim Əliquliyev qeyd olunan istiqamətdə bir sıra konkret təkliflərini iclas iştirakçılarının nəzərinə çatdırıb.

Gündəlikdə yer alan digər məsələ, “AMEA Rəyasət Heyətinin nəzdində Virtual Elektron Fəaliyyət Cəmiyyətinin təsis edilməsi” haqqında AMEA-nın birinci vitse-prezidenti, akademik İsa Həbibbəyli məlumat verib. Qeyd edib ki, Azərbaycanda cəmiyyətin modernləşdirilməsi istiqamətində uğurla həyata keçirilən dövlət siyasətinin mühüm istiqamətlərindən birini “Virtual Azərbaycan”ın formalaşdırılması təşkil edir. “Virtual Azərbaycan”ın formalaşdırılmasında AMEA-nın üzərinə mühüm vəzifələr düşür. Bu istiqamətdəki fəaliyyətin daha effektiv qurulması, pərakəndəliyin aradan qaldırılması, həyata keçirilən işlərin vahid mərkəzdən koordinasiyası və onların daha sistemli təşkili məqsədilə müstəqil qurumun yaradılmasına ehtiyac vardır. Məsələ geniş müzakirə olunduqdan sonra AMEA Rəyasət Heyətinin nəzdində ictimai əsaslarla Virtual Elektron Fəaliyyət Cəmiyyətin təsis edilməsi haqqında qərar qəbul edilib. AMEA prezidentinin köməkçisi, fəlsəfə elmləri doktoru Ələddin Məlikov ictimai əsaslarla AMEA Rəyasət Heyətinin nəzdində Virtual Elektron Fəaliyyət Cəmiyyətinin sədri təyin edilib.

“AMEA-nın Neft və Qaz İnstitutunun strukturunda qismən dəyişiklik edilməsi” və “AMEA-nın Neft və Qaz İnstitutunun Neftin goekimyası laboratoriyasının Geologiya və Geofizika İnstitutunun tərkibinə keçirilməsi” ilə bağlı məsələlər haqqında AMEA-nın birinci vitse-prezidenti, akademik İbrahim Quliyev məlumat verib. Məsələlər müzakirə olunduqdan sonra müvafiq qərarlar qəbul edilib.

İclasda müzakirə olunan digər məsələ “Hüceyrə texnologiyalarının inkişafı proqramı” barədə çıxış edən AMEA-nın vitse-prezidenti, akademik Rasim Əliquliyev bildirib ki, AMEA Rəyasət Heyətinin 17 iyul 2019-cu il tarixli qərarı ilə AMEA-nın Fizika-Riyaziyyat və Texnika Elmləri Bölməsinə daxil olan Biofizika İnstitutuna hüceyrə texnologiyalarının inkişaf proqramının hazırlanması tapşırılıb. Ötən müddət ərzində AMEA-nın Biofizika İnstitutu tərəfindən proqram hazırlanmış və nəzərdə tutulan işlərin həyata keçirilməsi üçün lazımi avadanlıq, cihaz və kimyəvi reaktivlərin siyahısı tərtib edilmişdir.

Sonra AMEA-nın Biofizika İnstitutunun direktoru, AMEA-nın müxbir üzvü Oktay Qasımov hüceyrə texnologiyalarının inkişaf proqramını təqdim edərək bildirib ki, son onillikdə təbiətdə baş verən sürətli dəyişikliklərə vaxtında cavab verilməsi üçün yeni innovativ texnologiyaların yaradılması zəruridir. Yaranan yeni şərait tibbi-biologiyanın qarşısında yeni-yeni problemlər qoyur və bunlara adekvat cavab verilməlidir. Tibbi problemlər çoxfaktorlu və mürəkkəb olduğundan onların həllində molekulyar və hüceyrə texnologiyaları, gen və zülal mühəndisliyi mühüm rol oynayır.

AMEA Rəyasət Heyətinin üzvü, akademik Cəmil Əliyev, AMEA-nın Biofizika İnstitutunun laboratoriya müdiri, AMEA-nın müxbir üzvü İlham Şahmuradov, Azərbaycan Tibb Universitetinin prorektoru, biologiya üzrə fəlsəfə doktoru Orxan İsayev, AMEA-nın Biofizika İnstitutunun elmi işlər üzrə direktor müavini, biologiya elmləri doktoru Kərim Qasımov, Milli Onkologiya Mərkəzinin laboratoriya müdiri, tibb üzrə fəlsəfə doktoru Leylaxanım Məlikova, Biofizika İnstitutunun elmi katibi, biologiya üzrə fəlsəfə doktoru Flora Mehrəliyeva proqramın müzakirəsində yaxından iştirak ediblər.

Geniş müzakirələrdən sonra AMEA-nın Biofizika İnstitutu tərəfindən hazırlanmış “Hüceyrə texnologiyalarının inkişafı proqramı” təsdiq edilib.

İclasda NATO-nun dəstəyi ilə “Sənaye idarəetmə sistemlərinin kibertəhlükəsizliyi problemləri” beynəlxalq konfransının, həmçinin Avropa Komissiyasının dəstəyi ilə “Şərq Tərəfdaşlığı ölkələri üçün E-infrastrukturlar” mövzusunda beynəlxalq konfranslarla bağlı məsələlər də geniş müzakirə edilib, hər iki beynəlxalq tədbirin keçirilməsi ilə bağlı müvafiq qərarlar qəbul edilib.

İclasda dünya şöhrətli azərbaycanlı alim, qeyri-səlis çoxluqlar nəzəriyyəsinin və qeyri-səlis məntiqin banisi, Kaliforniya Berkli Universitetinin professoru, AMEA-nın fəxri üzvü Lütfi Zadənin anadan olmasının 100 illik yubileyinin qeyd edilməsi haqqında məsələ müzakirə edilib. Həmçinin görkəmli riyaziyyatçı alim, AMEA-nın müxbir üzvü Kamil Ayda-zadənin 70 illik yubileyinin qeyd edilməsi haqqında məsələyə baxılıb. Məsələlər haqqında müvafiq qərarlar qəbul olunub.

Sonra çıxış edən AMEA-nın akademik-katibi Əminağa Sadıqov iclasın gündəliyində yer alan “AMEA-nın regional elmi tədqiqat və təcrübə-sınaq bazalarına məxsus əmlakın inventarlaşdırılmasının nəticələri haqqında” məlumat verib. Məsələ müzakirə olunduqdan sonra müvafiq qərar qəbul edilib.

İclasda bir sıra məsələlərin müzakirəsində AMEA-nın vitse-prezidentləri, akademiklər – Tofiq Nağıyev, Dilqəm Tağıyev, İradə Hüseynova da rəy və təklifləri ilə yaxından iştirak ediblər.        

Sonda kadr məsələsinə baxılıb. Biologiya üzrə fəlsəfə doktoru Minarə Həsənova AMEA-nın Dendrologiya İnstitutunun elmi katibi təyin edilib.

© Mənbə: www.science.az