27/03/2018
Tusi haqqında təzadlı fikirlər. N.Tusinin islam dünyasının yetişdirdiyi ən parlaq zəka sahiblərindən biri olması şübhəsizdir. Məzhəb etibarı ilə o, şiə olmuş və şiə məzhəbinin əsaslarının nizama salınmasında əvəzsiz rol oynamış, böyük siyasi fəaliyyətlə məşğul olmuşdur. Bununla da o, müxalif mövqedə duran çoxlu şəxslərin qəzəbinə, haqsız tənqidlərinə, hətta iftiralarına məruz qalmışdır. Şiə aləminin bütün, islam dünyasının isə əksər nümayəndələri N.Tusinin şəxsiyyətinə, siyasi və elmi fəaliyyətinə yüksək qiymət vermiş, ona hörmətlə yanaşmışlar. Məsələn, sünni məzhəbinin alimlərindən Mühəmməd ibn Şakir, Sədəfi və başqaları Tusinin Bağdad alınarkən müsəlmanlara böyük xeyri dəydiyini söyləyirlər.
Əhli-hədis və əhli-sünnənin radikal nümayəndələri isə Tusi barəsində çox kəskin fikirlər söyləmişlər. Diqqət edilərsə, belə fikirlərin müəlliflərinin ya Tusinin baxışları ilə tanış olmadığı, ya da məsələdə qərəzli mövqe tutduqları aydın olur. Rəzəvinin adı çəkilən kitabından bir neçə nümunə ilə kifayətlənmək istərdik. ([1], səh. 43-45 və [8], səh. 70-71)[1].
– Şeyx Təqiəddin Əbülabbas Əhməd ibn Teymiyyə (qeyd edək ki, sonralar yaranmış vəhhabilik ideyası ibn Teymiyyədən çox təsirlənmişdir) nüseyrilər haqqında risaləsində yazır: “Nüseyri adlanan tayfa, eləcə də qərmətilər və batinilər yəhudi və xristianlardan da kafirdirlər… Bu tayfa daim islamın düşmənləri ilə dost və əlbir olmuşdur. Onlar üçün ən böyük müsibət müsəlmanların tatarlar üzərində qələbəsi olardı. Onların köməyi və yardımı olmasaydı, tatarlar islam ölkələrinə daxil olmaz və xəlifəni öldürməzdilər. Onların öndəri və başçısı Nəsirəddin Tusi idi ki, Ələmutda mülhidlərə vəzirlik etmişdir. Hülakunu xəlifənin ölümünə təhrik edən də odur. Bu tayfa bir neçə adla tanınır, o cümlədən, mülhidlər, qərmətilər, ismaililər, nüseyrilər, xürrəmilər, mühəmmərilər. Böyük dini rəhbərlər onlar barədə belə demişlər: onların məzhəbinin zahiri rafizilikdir, batini isə xalis küfrdür. Onların əqidəsinin mahiyyəti və batini budur ki, heç bir peyğəmbərə inanmırlar, Nuhu, İbrahimi, Musanı, İsanı və Mühəmmədi tanımırlar…”
– İbn Teymiyyənin şagirdi ibn əl-Qəyyum əl-Cəuziyyə (1292-1350) isə “İğasətul-lahfan min məkayidiş-şeytan” əsərində daha da irəli gedərək yazır: “Növbə müşriklik və küfrün nəsiri (yardımçısı), mülhid, mülhidlərin vəziri, Hülakunun vəziri Nəsir Tusiyə çatanda, o özünü peyğəmbərin ardıcıllarından və onun dininin davamçılarından kənara çəkib onları qılınca verdi, hətta mülhidlərdən də uzaqlaşdı ki, özünü təmizə çıxarsın. Və o, xəlifəni, qazıləri, fəqihləri, mühəddisləri qətlə yetirib filosofları, ixvaniləri, münəccimləri, materialistləri və sehrbazları qabağa çəkdi. Mədrəsələrin, məscidlərin və karvansaraların əmlakını onların ixtiyarına verdi və onları öz yaxın adamlarına çevirdi. Və o, öz kitablarında aləmin əzəliliyini irəli sürdü, qiyaməti rədd etdi. Rəbbin elm, qüdrət, dirilik, eşitmə və görmə kimi sifətlərini inkar etdi. … və mülhidlərin imamı İbn Sinanın “İşarat”ını Quranın yerinə qoymaq istədisə də, buna gücü çatmadı. O deyirdi: “Bu, seçilmişlərin Quranıdır, o isə kütlənin Quranıdır”. Və namazı dəyişdirib iki namaz etmək istədi, amma bu işi axıra çatdıra bilmədi. Nəhayətdə sehrbazlıq öyrənib bütlərə pərəstiş edən sehrbaza çevrildi. Mühəmməd ibn Əbdülkərim Şəhristani “Kitab əl-müsari’” adlı əsərində İbn Sinanın əleyhinə çıxaraq, onun aləmin əzəli olmasına, qiyamətin inkarına, Rəbbin elm və qüdrətinin, Onun aləmi xəlq etməsinin rəddinə dair fikirlərini batilə çıxardı. Və küfrün yardımçısı [Tusi] isə “Məsari’ əl-müsari’” adlı kitabında ona [Şəhristaniyə] qarşı çıxdı. Həmin kitabda bildirdi ki, Allah-təala göyləri və yeri altı günə yaratmayıb; O nə bir şey bilir, nə də öz qüdrəti və ixtiyarı ilə bir şey edir və heç kəs qəbirdən ayağa qalxmayacaq”.
– Sübki “Təbəqatüş-şafeiyyətül-kübra” adlı kitabında yuxarıdakıları xatırladıb, Tusini “aşkar şeytan” adlandırır və onu xəlifənin – Peyğəmbərin (s.s) əmisi oğlunun, yəni Abbasi xəlifəsinin qətlinin günahkar və səbəbkarı hesab edir.
Bu irad və tənqidlər barəsində bir neçə söz demək istərdik. Sonuncu Abbasi xəlifəsinin ölümü ilə bağlı aşağıdakı fikir geniş yayılmışdır: Peyğəmbərin qohumu və varisi olduğu üçün, xəlifə öldürüləcəyi təqdirdə yer üzərində fəsadlar, dağıntılar,
zəlzələlər baş verəcəyi ilə bağlı Hülaku xanın müşavirləri müxtəlif fikirlər söyləyərək, onu xəlifəni öldürməkdən çəkindirməyə çalışmışlar. Hülaku xan isə Tusiyə müraciət etmişdir. Tusi də xəlifələrin öldürülməsi, taxtdan endirilərək qətl edilmələri ilə bağlı tarixi faktlar gətirmiş, lakin heç bir fövqəladə hadisənin baş vermədiyini söyləmiş, Hülaku xanı bu işə təhrik etmişdir. Guya monqollar xəlifəni xalçaya büküb, o qədər döymüşlər ki, xəlifə ölmüşdür (başqa bir rəvayətə görə çaya atmışlar). Fikrimizcə, bunların heç biri ağlabatan deyil:
– Hülaku xanın məsləhət üçün Tusiyə müraciətinə gəldikdə, sözsüz ki, Hülaku xan Tusinin, xüsusən dövlət idarəçiliyi, maliyyə məsələləri, astronomiya – nücum ilə (səhra və düzəngahlarda yaşayan, özlərini göylərin övladları hesab edən bir xalqın nümayəndəsi üçün bunu təbii hesab etmək olar) bağlı fikirlərinə önəm vermişdir. Ancaq xoşumuza gəlməsə də, yaddan çıxarmamalıyıq ki, XIII əsrdə monqol qoşunları istədikləri ölkəni, diyarı fəth etmiş, dünya xəritəsindəki sərhədləri silmiş, onlara müqavimət göstərən hansısa real bir qüvvə tanımamışlar. Bu müdhiş fatehlər sanki müxtəlif ölkələri qılıncları və atları ilə deyil, yalnız bir baxışları ilə fəth edirdilər. Hansısa başqa bir mədəniyyətin nümayəndəsinin onları bu fatehlik düşüncəsindən yayındıra, yaxud atacağı addımlarda şübhəyə sala biləcəyi fikri absurd görünür. Bu düşüncə, yəqin ki, sırf monqol fenomenidir. Hətta Hülaku xan vəfat etdikdən sonra, onun oğlu Abaqa xan varis olmasına baxmayaraq, onu hakim olmağa razı salmaq mümkün olmadıqda, Tusiyə müraciət edilmiş, nücumun əsasında onu hakimliyə razı salmışdır. Məgər bu monqolların hökmdarlıqdan çox fatehlik arzularının göstəricisi deyilmi?! Yəqin ki, belə üsulla monqolları öz fikirlərindən yayındırmaq mümkün olsaydı, çinlilər öz imperatorları haqqında daha əsrarəngiz sözlər söyləyərək, onları Çinin istilasından daşındırardılar.
– Xəlifənin peyğəmbərin qohumu və onun xəlifəsi olmasına gəldikdə, Tusi şiə olduğu üçün bütün əqidəsi ilə dini və mülki hakimiyyətin peyğəmbərin övladlarına aid olduğu qənaətində olmuş, buna görə də, o, Abbasi xəlifələrinin hakimiyyətini qeyri-qanuni hesab etmişdir.
– Xəlifənin qanının yer üzünə tökülməməsi ilə bağlı fikrə gəldikdə, burada da yaddan çıxarmaq olmaz ki, monqollar özlərinin ən məşhur fateh və döyüşçülərini də öldürərkən, elə ölüm üsulu seçmişlər ki, onların qanı yer üzərinə tökülməsin. Bu baxımdan, xəlifənin belə üsulla öldürülməsi monqolların islam xəlifəsinə, tarixinə, səltənətinə hörməti kimi də qəbul edilə bilər.
İstənilən halda, monqol düşüncəsinə varmadan, onların tarixi sənədlərini araşdırmadan, yalnız yabançı xalq və mədəniyyətə mənsub tarixçilərin yazıları əsasında bu hadisələrə obyektiv qiymət vermək düzgün olmaz.
N.Tusinin fərqli düşüncə sahiblərinə münasibətinə gəldikdə isə, gördüyümüz kimi, Tusinin müəllimləri arasında təkcə şiə alimləri deyil, digər məzhəblərin nümayəndələri də olmuşdur. Bundan əlavə, o, təkcə dini deyil, başqa elmlər sahəsində də geniş axtarışlar aparmış, islamdan kənar fikir sahiblərinin elmi irsi ilə yaxından tanış olmuş, onların əsərlərini öyrənmiş, insan düşüncəsinin müxtəlif spektrləri ilə rastlaşmışdır. Yəqin ki, buna görə də Tusinin əsərlərində digər məzhəb nümayəndələrinə dözümlü yanaşmanın, yalnız elmi xarakterli irad və etirazların şahidi oluruq. Rəzəvi yazır: “Tusi şiəliyin yayılmasına çalışsa da, dili və qələmi ilə imamı məzhəbinin inkişafına səy göstərsə də, bütün islam firqələri ilə mehriban münasibət saxlayırdı, imkanı daxilində bütün müsəlmanların qarşılaşdığı problemləri həll edirdi və daim quru təəssübkeşlikdən uzaq gəzirdi, haqqın və həqiqətin tərəfində dayanırdı.” ([1], s. 45).
Digər bir nümunə kimi, söyləyək ki, radikal din xadimlərinin irfan (təsəffüf) əhlinə – sufilərə münasibəti kəskin olmuşdur. Mənsur əl-Həllac, Nəsimi və s. kimi məşhur sufi nümayəndələri küfrdə günahlandırılaraq öldürülmüşlər. N.Tusinin irfana baxışına gəldikdə isə, onun mövqeyi tam fərqli olmuşdur. Rəzəvi Tusinin “Əvsaf əl-əşraf” əsərindən aşağıdakı sitata müraciət edir : “[Tusi] onların [sufiləri küfrdə günahlandıranların] fikirlərinə aşağıdakı kimi etiraz edir: “Tövhid şeyin bir (vahid) tutulmasıdır. İttihad isə onun [şeyin] birə (vahidə) çevrilməsidir. [Allah] “Allahdan başqasını ilahi qərar vermə!”, başqa bir yerdə isə “Allahdan başqa ilahi çağırma” söyləmişdir. Beləliklə, tövhiddə ittihada xas olan təkəllüfdəki qoşmalıq yoxdur. O, [sufi] batini əqlindən süzülərək vəcdə gəlmiş mütləq tövhidə yetişmişsə, əbədi olaraq Ondan başqa heç bir şeyə diqqət etmir, nəticədə ittiahada yetişir. [Beləliklə,] ittihad heç də dar düşüncəli insanların qatışdırdığı kimi bəndənin Allahla birləşməsi (ittihadı) deyil. Allah bundan çox uca və böyükdür! Əksinə, hamının Ona məşəqqətsiz bəsirət gözü ilə baxmasıdır, … [elə bir məqama çatmaqdır ki, başa düşsün ki,] Ondan başqa hər şey Ondandır, bütün hər şey vahiddir. Necə ki, insan Təalanın təcəlliayat nuru ilə bəsirətə yetişir, Ondan başqasını görmür, heç bir şeyi idarə etmir, heç bir şeyə diqqət və nəzər etmir. Nəticədə, hər şey çevrilib vahid olur.
Mənimlə Sənin ayrılığındandır ki,
özlüyüm məni özümdən qoparır,
Öz fəzilətinlə mənim özlüyümü
bu ayrılıqdan qurtar (qoru)!”
söylədikdə əl-Hüseyn ibn Mənsur əl-Həllacın duası müstəcəb olmuş, onun həqiqiliyi (özlüyü) aradan getmiş, o elə bir dərəcəyə çatmışdır ki, “Mən eşqin özüyəm, eşqin özü mənəm!”[2] söyləyə bilmişdir. Beləliklə, “mənəm Həqq”, yaxud “sübhan olsun mənə!
Dərvişlərə münasibətə gəldikdə isə, N.Tusinin onları müsbət qəbul etmədiyi söylənir. Qələndəriyyə dərvişlərini görən Hülaku xan Tusidən onların kimliyi haqqında soruşduqda, “dünyanın artıq (lazımsız) ünsürləri” cavabı vermişdir. Yəqin ki, bu da N.Tusinin “ayıq irfan”, yəni irfanda “trans” deyil, intellektual istiqamətin tərəfdarı olmasının, ya da irfanın yüksək intellektual şəxslərin məşğuliyyəti olduğunun göstəricisidir.
Davamı var…
[1] Müdərris Rəzəvi. Nəsirəddin Tusinin həyatı və əsərləri (fars dilindən tərcümə). Bakı, Nurlan, 2002, 212 s.
[2] Мамедбейли Г.Д. Основатель Марагинской обсерватории Мухаммед Насиреддин Туси. Изд. АН Азербайджанской ССР. Баку – 1961 г., 316 с.
[3] Матвиевская Г. П., Розенфельд Б.А. Математики и астрономы мусульманского средневековья и их труды (8-17 вв.). Наука -1983, 651 с.
[4]Xəlilov A., Musayeva A. “Xacə Nəsirəddin Tusi. Biblioqrafiya”. Bakı, XXI –Yeni Nəşrlər Evi – 2004, 168 səh.
[5] Стройк Д.Я. Краткий курс истории математики. Наука – 1969 г., 328 с.
[6] Xacə Nəsirəddin Tusi. Təcrid əl-etiqad. Kəlam hissəsi. (Tərcümə və şərh: Məmmədov E.M.), “Araz” nəşriyyatı, Bakı 2015, 206 s.
[7] Атаи А.А., Зейналов Р.А. Г.Дж. Мамедбейли – первый исследователь наследия Насиреддина Туси в Азербайджане. Материалы Международной конференции, посвященной 810-летию Мухаммеда Насиреддина Туси. Баку -2011, с. 38-49.
[8] Mühəmməd Təqi Müdərris Rəzəvi. əl-Əllamətü əl-Xacə Nəsir əd-Din ət-Tusi. Həyatühü və asarüh.( محمد تقى مدرس رضوي .العلامة الخواج نصير الدين الطوسى. حياته و آثاره.). Tehran, 1994, 449 s.
Mənbə: Misir Mərdanov, Eminağa Məmmədov “Nəsirəddin Tusinin həyatı, elmi fəaliyyəti və irsinin öyrənilməsinin bəzi aktual məsələləri” , “AMEA-nın Xəbərlər Məcmuəsi” jurnalı, 2016, cild 3, No 3, səh. 12-29.
© Bütün hüquqlar qorunur. Xəbərlərdən istifadə edərkən www.imm.az saytına istinad zəruridir.