13/04/2018
Tusinin məntiqi irsi haqqında. Orta əsrlərin Yaxın Şərqində yunan elmi irsinin bütün elm sahələrinə təsiri danılmazdır. Bunların arasında bütün dövrlər üçün aktuallığını saxlayan Aristotelin (e.ə. 384-322) məntiqi irsi xüsusi önəm daşıyır. Təsadüfi deyil ki, Aristotel klassiklərimiz tərəfindən “Birinci müəllim” sayılmış və ona “Sahib əl-məntiq” (“məntiqin sahibi”) ləqəbi verilmişdir. Şərq məntiqçiləri Aristotel irsinin tam daşıyıcısı olmaqla yanaşı, onu daha da inkişaf etdirmişlər. əl-Kindi, əl-Farabi, İbn Sina, İbn Rüşd və orta əsrlərin digər universal zəka sahibləri məntiq elminə diqqət ayırmış, əsərlər yazmışlar. N.Tusi də bu sahədə fundamental əsərlər yazmış və öz töhfəsini vermişdir.
Fəlsəfi məsələlərin əsaslanması üçün məntiqin tətbiqi ilə bağlı olan əsərləri və eyni bir əsərin müxtəlif versiyalarını nəzərə almasaq, dövrümüzə kimi N.Tusinin ənənəvi məntiqə həsr edilmiş dörd əsərinin gəlib çatdığını söyləmək olar.
Bunların arasında böyük həcmli “Əsas əl-iqtibas” (əsər fars dilində yazılmışdır) traktatı ən fundamental əsərdir. İkinci əsər Əbu Əli əl-Huseyn ibn Abdullah ibn Sinanın (980-1037) “əl-İşarat vət-tənbihat” (“İşarələr və öyüdlər”) kitabına N.Tusinin şərhlərindən ibarət “əş-Şərh “əl-İşarat vət-tənbihat”” (“İşarələr və öyüdlər”ə şərhlər) əsəridir (əsər ərəb dilindədir). Əsərin İbn Sinanın baxışlarının müdafiəsində və yenidən canlanmasında böyük rolu olmuşdur. “Əş-şərh “əl-İşarat vət-tənbihat”” əsərinin məntiqə həsr edilmiş birinci hissəsi 2004-cü ildə Əlyazmalar İnstitutunun əməkdaşı Söhrab Bayramov tərəfindən Azərbaycan dilinə tərcümə edilərək, ayrıca kitab şəklində nəşr edilmişdir.
Üçüncü əsər N.Tusinin müasiri olmuş Əsir əd-Din əl-Əbhərinin (1263-cü ildə vəfat edib) “Tənzil əl-əfkar” kitabının tənqidinə həsr edilmiş “Tədil əl-meyar fi nəqd tənzil əl-əfkar” əsəridir.
Dördüncü əsər isə N. Tusinin “Təcrid əl-məntiq” traktatıdır. Rəzəvi qeyd edir ki, “Təcrid əl-məntiq” 1258-ci ildə yazılıb. Bu əsər də ənənəvi məntiq elminə və onun məsələlərinin işıqlandırılmasına həsr edilmişdir. Əsər özünün yığcamlığı və lakonik fikirləri ilə seçilir. Buna baxmayaraq, burada ənənəvi məntiqin bütün məsələləri öz əksini tapmışdır. Bu barədə N.Tusi kitabın əvvəlində yazır:
“Rəhman, rəhim olan Allahın adı ilə.
Allaha şükr edənlərin həmdilə şükr edir, Mühəmməd və onun pak ailəsinə salavat göndəririk.
[Mətləbə gəldikdə isə] məntiqin özəklərini və onun məsələlərini sistematik şəkildə ayırıb, lakonikliyin (yığcamlığın) və izahların inciləri ilə təmin etmək istədik. Belə ki, bilən üçün onun təkrarı, öyrənmək istəyənlər üçün isə yadda saxlanması yüngül olsun. Bu özəkləri doqquz fəsildə tərtib etdik”.
Əsər 2012-ci ildə E.Məmmədov tərəfindən azərbaycan dilinə tərcümə edilərək, ön söz və şərhlərlə birlikdə nəşr edilmiş, 2015-ci ildə isə Əli Əliyev tərəfindən rus dilinə çevrilmişdir.
N.Tusinin əksər əsərləri kimi “Təcrid əl-məntiq” əsərini də bir sıra alimlər dəfələrlə şərh etmişlər. Bunların arasında N.Tusinin tələbəsi Əllamə Hillinin şərhlərindən ibarət “Cövhər ən-nəzid fi şərh “Təcrid əl-məntiq”” əsəri [12] xüsusilə məşhurdur. Kiataba yazılan ön sözdə aşağıdakı qeydlə rastlaşırıq:
“…[N.Tusi] çox güman ki, onu (yəni “Təcrid əl-məntiq”i) “Təcrid əl-etiqad” kitabına giriş kimi yazmışdır. Çünki fəlsəfənin məntiqə ehtiyacı olduğu kimi, kəlam elminin də məntiqə ehtiyacı var. Xüsusilə Xacə [N.Tusi nəzərdə tutulur] kəlamı fəlsəfi üslubda yazaraq, ona daha çox fəlsəfi məzmun vermişdir. Buna görə də, onun şagirdi olan Əllamə Hilli “Təcrid əl-etiqad” kitabını şərh etdiyi kimi bu kitabı da şərh edərək, onu “Cövhər əl-nəzid fi şərh “Məntiq əl-təcrid”” adlandırmışdır”
Materialın təhlilindən aydın olur ki, çox vaxt Hillinin şərhləri N.Tusinin İbn Sinanın “Əl-işarat vət-tənbihat” əsərinə verdiyi şərhlərlə üst-üstə düşür.
Davamı var…
[1] Müdərris Rəzəvi. Nəsirəddin Tusinin həyatı və əsərləri (fars dilindən tərcümə). Bakı, Nurlan, 2002, 212 s.
[2] Мамедбейли Г.Д. Основатель Марагинской обсерватории Мухаммед Насиреддин Туси. Изд. АН Азербайджанской ССР. Баку – 1961 г., 316 с.
[3] Матвиевская Г. П., Розенфельд Б.А. Математики и астрономы мусульманского средневековья и их труды (8-17 вв.). Наука -1983, 651 с.
[4]Xəlilov A., Musayeva A. “Xacə Nəsirəddin Tusi. Biblioqrafiya”. Bakı, XXI –Yeni Nəşrlər Evi – 2004, 168 səh.
[5] Стройк Д.Я. Краткий курс истории математики. Наука – 1969 г., 328 с.
[6] Xacə Nəsirəddin Tusi. Təcrid əl-etiqad. Kəlam hissəsi. (Tərcümə və şərh: Məmmədov E.M.), “Araz” nəşriyyatı, Bakı 2015, 206 s.
[7] Атаи А.А., Зейналов Р.А. Г.Дж. Мамедбейли – первый исследователь наследия Насиреддина Туси в Азербайджане. Материалы Международной конференции, посвященной 810-летию Мухаммеда Насиреддина Туси. Баку -2011, с. 38-49.
[8] Mühəmməd Təqi Müdərris Rəzəvi. əl-Əllamətü əl-Xacə Nəsir əd-Din ət-Tusi. Həyatühü və asarüh.( محمد تقى مدرس رضوي .العلامة الخواج نصير الدين الطوسى. حياته و آثاره.). Tehran, 1994, 449 s.
[9] Матвиевская Г.П. Насир ад–Дин ат-Туси и его математическое и астрономическое наследие. Məhəmməd Nəsirəddin Tusinin 810 illiyinə Həsr edilmiş Beynəlxalq konfransın Materialları. Bakı – 2011, s. 223-228.
[10] Мат-ая Энциклопедия 1 (А-Г). Изд-во «Советская Энциклопедия», М. 1977.
[11] Tusi N. “Təcrid əl-məntiq” (ərəb dilndən tərcümə və şərhlər Məmmədov E.M.). Bakı, Araz -2012, 260 s.
[12] Əllamə Hilli. Əl-cövhər ən-nəzid fi şərh məntiq ət-təcrid (Mücərrəd məntiqin nizamlanmış (sistematik) cövhəri). Qum – 2007, 480 səh.
Mənbə: Misir Mərdanov, Eminağa Məmmədov “Nəsirəddin Tusinin həyatı, elmi fəaliyyəti və irsinin öyrənilməsinin bəzi aktual məsələləri” , “AMEA-nın Xəbərlər Məcmuəsi” jurnalı, 2016, cild 3, No 3, səh. 12-29.
© Bütün hüquqlar qorunur. Xəbərlərdən istifadə edərkən www.imm.az saytına istinad zəruridir.