Elmi şuranın növbəti iclası keçirilib

AMEA Riyaziyyat və Mexanika İnstitutunda Elmi Şuranın növbəti  iclası keçirilib. İclası institutun direktoru, AMEA-nın müxbir üzvü, professor Misir Mərdanov açıb. Professor elmi şura üzvlərini Azərbaycanın paytaxtı Bakının Beynəlxalq Sərgilər Bürosunun 2025-ci ildə keçiriləcək Ümumdünya Sərgisinə namizəd şəhər olması barədə məlumatlandırıb. Qeyd edib ki, sərginin mövzusu “İnsan kapitalını inkişaf etdirək, daha yaxşı gələcək quraq” olacaq.

Sonra “Elastiklik və plastiklik nəzəriyyəsi”, “Ictimaiyyətlə əlaqələr”, “Beynəlxalq əlaqələr”, “Cəbr və riyazi məntiq”, “Hesablama riyaziyyatı və informatika” şöbələrinin müdirləri f-r.e.d., prof. Vaqif Hacıyev, f.ü.f.d Aynurə Cəfərova, t.ü.f.d, dos. Eldar Abbasov, r.ü.f.d, dos. Əli Babayev, t.ü.f.d Həsən Nağıyev rəhbərlik etdikləri şöbələrin illik fəaliyyəti haqqında hesabat veriblər.

Daha sonra “Diferensial tənliklər” şöbəsinin böyük elmi işçisi r.ü.f.d. Arzu Qəmbər qızı Əliyevaya 1211.01- Diferensial tənliklər ixtisası üzrə dosent elmi adının verilməsi məsələsinə baxılıb. Gizli səsvermə nəticəsində Azərbaycan Respublikası Prezidenti yanında Ali Attestasiya komissiyası qarşısında vəsatət qaldırılması qərara alınıb.

© Bütün hüquqlar qorunur. Xəbərlərdən istifadə edərkən www.imm.az saytına istinad zəruridir.

AMEA-da görkəmli alim Kərim Kərimovun anadan olmasının 100 illiyi qeyd edilib

Bu il görkəmli alim və hərbi xadim, kosmik proqramların gerçəkləşdirilməsinin fəal iştirakçısı, Sosialist Əməyi Qəhrəmanı, Dövlət və Lenin mükafatları laureatı, Azərbaycan Milli Elmlər Akademiyasının fəxri üzvü, general-leytenant Kərim Kərimovun anadan olmasının 100 ili tamam olur.

Noyabrın 16-da AMEA-da alimin yubileyinə həsr olunan tədbir keçirilib.

Tədbirdə AMEA-nın prezidenti, akademik Akif Əlizadə giriş sözü ilə çıxış edərək bildirib ki, Kərim Kərimovun 100 illik yubileyinin keçirilməsi Prezident İlham Əliyevin 30 yanvar 2017-ci il tarixli Sərəncamının icrasından irəli gəlir. Akademik A.Əlizadə Kərim Kərimovun kosmik aparatların və süni peyklərin yaradılmasında, həmçinin kosmik raket texnikasının inkişaf etdirilməsi sahəsində müstəsna xidmətlərindən danışıb. Qeyd edib ki, kosmik fəzanın tədqiq edilməsi məqsədi ilə güclü “Soyuz” raket daşıyıcılarının yaradılması, “Salyut” orbital stansiyasının qurulması bilavasitə K.Kərimovun rəhbərliyi altında həyata keçirilib. A.Əlizadə K.Kərimovun ötən əsrin 50-60-cı illərində kosmosa uçuşların intensivləşməsində bir alim kimi həmişə ön sırada dayandığını və 1961-ci ildə insanın kosmosa ilk uçuşu münasibətilə general-mayor hərbi rütbəsinə yüksəldiyini diqqətə çatdırıb.

AMEA rəhbəri unikal biliyə malik olan K.Kərimovun 25 il ərzində Kosmik Gəmilərin Uçuş Sınaqları üzrə Dövlət Komissiyasının sədri vəzifəsində işlədiyini, eyni zamanda elmi fəaliyyətlə də məşğul olduğunu vurğulayıb.

Sonra çıxış edən “Azərkosmos”ASC-nin İdarə Heyətinin sədri Rəşad Nəbiyev əfsanəvi şəxsiyyət Kərim Kərimovun araşdırmaları sayəsində əldə olunan elmi-texniki nəticələrin kosmik sənayedə tətbiqindən danışıb. R.Nəbiyev ASC-nin hazırkı fəaliyyəti, təqdim etdiyi peyk xidmətləri və perspektiv planları barədə də məlumat verib.

Tədbirdə iştirak edən rusiyalı kosmonavt Oleq Kotov “Rusiyanın pilotlaşdırılmış kosmonavtikasının inkişafı üçün perspektiv proqram” mövzusunda təqdimatla çıxış edib. O.Kotov pilotlaşdırılmış kosmik aparatların köməyi ilə kosmik məkanın tədqiqi və öyrənilməsi sahəsində Rusiya təcrübəsindən danışıb.

Yubiley mərasimində görkəmli fizik, keçmiş SSRİ Elmlər Akademiyasının həqiqi üzvü Roald Saqdeyev Kərim Kərimovun rəhbəri olduğu kosmik layihələrdən, sovet kosmanavtikasının, raket qurğularının yaradılması və inkişaf etdirilməsində xidmətlərindən söz açıb, onunla bağlı xatirələrini bölüşüb.

Tədbirdə Azərbaycan Müdafiə Sənayesi Nazirliyinin Milli Aerokosmik Agentliyinin baş direktorunun I müavini, texnika üzrə elmlər doktoru Tofiq Süleymanov Kərim Kərimovun həyat və fəaliyyətindən, alimin raket texnologiyaları yaradan konstruktor büroları və zavodlarında çalışarkən göstərdiyi yüksək təşkilatçılıqdan və elmi ixtiralarından danışıb.

Sonda görkəmli alimin xatirəsinə həsr olunan “Yüksəliş” sənədli filmi nümayiş olunub.

Mənbə: www.science.az

“Sadə variyasiya məsələsində Veyerştras variyasiyası və Veyerştras şərti” mövzusunda seminar keçirilib

Bu gün AMEA Riyaziyyat və Mexanika İnstitutunun “Optimal İdarəetmə” şöbəsinin növbəti seminarı keçirilib. Seminarda “Optimal İdarəetmə” şöbəsinin baş elmi işçisi f-r.e.d, professor Telman Məlikov “Sadə variyasiya məsələsində Veyerştras variyasiyası və Veyerştras şərti” mövzusunda çıxış edib.

Məruzə Veyerştras düsturu və kafi şərtlər haqqında olub.

© Bütün hüquqlar qorunur. Xəbərlərdən istifadə edərkən www.imm.az saytına istinad zəruridir.

Akademik Əşrəf Hüseynovun 110 illiyinin qeyd edilməsi haqqında Azərbaycan Respublikası Prezidentinin Sərəncamı

2017-ci ildə Azərbaycanın görkəmli riyaziyyatçı alimi, tanınmış pedaqoq, əməkdar elm xadimi, akademik Əşrəf İsgəndər oğlu Hüseynovun anadan olmasının 110 illiyi tamam olmuşdur.

Əşrəf Hüseynov fundamental tədqiqatlar müəllifi kimi aldığı nəticələr, yaratdığı nəzəriyyə və açdığı yeni istiqamətlərlə Azərbaycanda çoxəsrlik tarixə malik riyaziyyat elmini daha da zənginləşdirmiş, onun müasir mərhələdə inkişafına dəyərli töhfələr vermişdir. Uzun illər pedaqoji sahədə fəaliyyət göstərən və riyazi biliklərə dərindən yiyələnmiş yüksək hazırlıqlı mütəxəssislər nəsli formalaşdıran alimin çoxsaylı yetirmələri mənsub olduqları elmi məktəbin nailiyyətlərini layiqincə davam etdirmişlər.

Azərbaycan Respublikası Konstitusiyasının 109-cu maddəsinin 32-ci bəndini rəhbər tutaraq, Azərbaycan elmi qarşısında mühüm xidmətlərini və yüksəkixtisaslı kadrların hazırlanması işində səmərəli fəaliyyətini nəzərə alaraq, akademik Əşrəf Hüseynovun 110 illiyinin qeyd olunmasını təmin etmək məqsədi ilə qərara alıram:

1. Azərbaycan Milli Elmlər Akademiyası Azərbaycan Respublikasının Təhsil Nazirliyi ilə birgə akademik Əşrəf Hüseynovun 110 illiyinə dair tədbirlər planı hazırlayıb həyata keçirsin.

2. Azərbaycan Respublikasının Nazirlər Kabineti bu Sərəncamdan irəli gələn məsələləri həll etsin.

İlham Əliyev

Azərbaycan Respublikasının Prezidenti

Bakı şəhəri, 15 noyabr 2017-ci il.

 

Yer kürəsi böyüklüyündə yeni planet kəşf edilib

Günəş sisteminə qismən yaxın məsafədə mülayim iqlimə malik Yer kürəsi böyüklüyündə bir planet aşkarlanıb.

www.science.az xəbər verir ki, Çilidəki La Silla Rəsədxanasında yüksək dəqiqlikli cihazlar vasitəsilə kəşf edilən planetin 11 işıq ili uzaqda olduğu bildirilib. Yer kürəsinə ikinci ən yaxın planet olan yeni kəşfə “Ross 128 b” adı verilib.

Yeni planetin öz ulduzu ətrafında Yer kürəsinin Günəşə qədər olan məsafəsindən 20 dəfə yaxın fırlandığı, balaca ulduzun Günəşdən çox kiçik və daha az parlaq olması səbəbindən “Ross 128 b”nin Yer kürəsinə nisbətən aşağı radiasiyaya məruz qaldığı bildirilib.

Astronomlar “Ross 128 b”nin səthi temperaturunun Yer kürəsininkinə yaxın ola biləcəyini təxmin edirlər.

“Qaz – maye mühitlərində səs dalğalarının sönməsi, dispersiyası və zərbə dalğalarının intensivliyinin anormal artması” mövzusunda Ümuminstitut seminarı keçirilib

Bu gün AMEA Riyaziyyat və Mexanika İnstitutunda Ümuminstitut seminarı keçirilib. Ümuminstitut seminarında “Tətbiqi riyaziyyat” şöbəsinin baş elmi işçisi, f.-r.e.d., professor Faiq Nağıyev “Qaz–maye mühitlərində səs dalğalarının sönməsi, dispersiyası və zərbə dalğalarının intensivliyinin anormal artması” mövzusunda məruzə edib.
Məruzədə mayedə qaz qabarcıqlarının olmasına görə səs dalğalarının sönməsini və dispersiyasını təsvir edən nəzəri tədqiqatların nəticələri təqdim edilib.
Eksperimentdə aşkar edilmiş həll edilə bilən qaz qabarcıqları – maye ikifazlı sistemdə zərbə dalğasının güclənməsi effekti çoxfazlı mühit mexanikası metodları ilə təsdiq edilən hesablamaların nəticələri məruzə edilib.

© Bütün hüquqlar qorunur. Xəbərlərdən istifadə edərkən www.imm.az saytına istinad zəruridir.