“Elm” qəzetinin yeni sayları işıq üzü görüb

AMEA Rəyasət Heyətinin mətbu orqanı olan “Elm” qəzetinin cari ildə 12-13-cü nömrələri çapdan çıxıb.

Qəzetin ilk səhifəsində ölkə Prezidenti İlham Əliyevin “T.C.Cəfərovun “Şöhrət” ordeni ilə təltif edilməsi”, “F.Ə.Qədirova “Əməkdar elm xadimi” fəxri adının verilməsi”, “Ş.M.Muradovun “Azərbaycan Respublikası Prezidentinin fəxri diplomu” ilə təltif edilməsi” haqqında müvafiq sərəncamları, həmçinin “Azərbaycan Respublikasının Dövlət Dil Komissiyası yanında Monitorinq Mərkəzinin Müşahidə Şurasının təsdiq edilməsi” haqqında Azərbaycan Respublikasının Baş Nazirinin sərəncamı yer alıb.

Mətbu orqanın ikinci və üçüncü səhifələrində “Milli dövlətçilikdə və bəşəri humanizmdə Mehriban Əliyeva fenomeni” və “Xalqımızın inkişafı naminə Mehriban Əliyevanın çoxşaxəli və səmərəli fəaliyyəti” sərlövhəli məqalələr yer alıb.

Nəşrdə, həmçinin AMEA-nın prezidenti, akademik Ramiz Mehdiyevin Fransanın ölkəmizdəki səfiri ilə görüşü, akademiyanın Rəyasət Heyətinin iclasları, Respublikada su təsərrüfatının vəziyyətinin yaxşılaşdırılması məqsədilə aparılması nəzərdə tutulan tədqiqatlar, 2020-ci il üçün doktorantura və dissertanturaya qəbul elanı, Milli Transliterasiya Sisteminin təqdimat tarixi, Yer Elmləri Bölməsinin, Fizika-Riyaziyyat və Texnika Elmləri Bölməsinin Elmi şuralarının iclasları, həmçinin İnventarlaşdırma Komissiyasının yığıncağı, AMEA və Fransanın Monpelye Universiteti arasında müştərək doktorantura proqramı, Alimlərimizin ağciyər xərçənginin müalicəsində mühüm nəticə əldə etməsi, Əlyazmamızın UNESCO-nun Dünya yaddaşı beynəlxalq reyestrinə daxil edilməsi və s. məlumatlara rast gəlmək olar.

Bundan əlavə, “Düşmənin öz məğlubiyyətini danmaq cəhdləri və saxtakar təxribatçılığı”, “Azərbaycanlı filosof Molla Rəcəbəli Təbrizi”, “Koronavirus pandemiyası: elmi tədqiqatlardan sağlam gələcəyin təminatına doğru”, “Görkəmli kimyaçı alim və pedaqoq”, “Cənubi Qafqaz. 1903-cü il” xəritəsi: ermənilərin toponimik aqressiyalarını arqument kimi ifşa edən tarixi-coğrafi xəritələr”, “Unudulmaz pedaqoq, tərcüməçi, islamşünas alim”, “Naxçıvan Muxtar Respublikasının zəngin heyvanlar aləmi öyrənilir”, “Azərbaycan arxeologiya elmi 75 ildə”, “Uğurlara aparan qoşa qanad: arxeologiya və jurnalistika”, “Tarixçi alimin şöhrəti”, “Alim adını uca tutan insan” adlı məqalələr, həmçinin AMEA-nın müxbir üzvü Əlövsət Quliyevlə kəhrizlərin bərpası barədə müsahibə ilə tanış ola bilərsiniz.

32 səhifəlik qəzetdə, həmçinin rus dilində maraqlı yazılar da yer alıb.

Qeyd edək ki, 1984-cü ildən nəşr olunmağa başlayan “Elm” qəzetinin baş redaktoru Mətbuat və informasiya şöbəsinin müdiri, filologiya üzrə fəlsəfə doktoru Ağahüseyn Şükürovdur.

© Mənbə: www.science.az

AMEA-nın magistraturasında 2020/2021-ci tədris ilinə başlanılıb

Azərbaycan Milli Elmlər Akademiyasının (AMEA) magistraturasında 2020/2021-ci tədris ili sentyabr ayının 15-dən II kurs tələbələrin fərdi tədris planlarında nəzərdə tutulmuş fənlərin tədrisi ilə başlayıb. Koronavirus pandemiyasının yayılmasının qarşısını almaq məqsədilə dərslər distant formada təşkil edilir. I kurs magistrantların tədris prosesi isə oktyabr ayının 1-dən etibarən ənənəvi formada başlayacaq.

AMEA-nın magistraturasının I kursunda 13 ixtisas, 40 ixtisaslaşma üzrə 56 magistrant, II kursunda isə 22 ixtisas, 75 ixtisaslaşma üzrə 121 magistrant təhsil alır. Beləliklə, hazırda AMEA-nın magistraturasında 23 ixtisas, 81 ixtisaslaşma üzrə 177 magistrant təhsil alır.

AMEA rəhbərliyi tərəfindən magistratura pilləsində təhsilin  müvafiq norma və qaydalara uyğun həyata keçirilməsi üçün bütün zəruri təşkilati tədbirlər görülüb.

© Mənbə: www.science.az

“Horizon 2020” Green Deal Call proqramı çərçivəsində vebinar keçiriləcək

18 sentyabr 2020-ci il tarixində saat 12:00-da “Horizon 2020” Green Deal Call (Yaşıl razılaşma çağırışı) proqramı çərçivəsində Avropa İttifaqının Şərq Tərəfdaşlığı (ŞT) ölkələri üçün maliyyə imkanları üzrə vebinar keçiriləcək.

Avropa Komissiyasının Beynəlxalq Əməkdaşlıq Xidmət Təşkilatı tədqiqatçıları və digər maraqlı tərəfləri virtual təlimlərdə aktiv iştiraka dəvət edir.

Virtual Green Deal təlimləri üç sessiyadan ibarətdir və hər biri Green Deal çağırışını müxtəlif aspektlərdən əhatə edir. Birinci sessiyada ümumi icmal təqdim ediləcəyi halda, ikinci və üçüncü sessiyalar daha çox təfsilata yönəldiləcək, həmçinin şəbəkələrin yaradılması və layihə təkliflərinin yazılması kimi ümumi məqamlara toxunulacaq. İştirakçılar digər müvafiq tədbirlər, məlumat mənbələri və şəbəkə imkanları üzrə linklərlə təmin ediləcək. Sessiyaların hər birində iştirak etmək olar.

Qeyd edək ki, Avropa Komissiyası ŞT ölkələrinin Avropa İttifaqı Çərçivə Proqramlarında və Avropa Tədqiqat Sahəsində (ERA) uğurlu iştirakını dəstəkləyir. Bu səbəbdən ŞT ölkələrindən olan tədqiqatçılara və innovasiya sahəsindəki mütəxəssislərə “Horizon 2020” və “Horizon Avropa” proqramlarına müraciətlərin hazırlanmasında köməklik göstərilir.

Vebinarda iştirak üçün bu linkdən qeydiyyatdan keçmək lazımdır.

© Mənbə: www.science.az

Azərbaycanlı alimin məqaləsi yüksək impakt faktorlu beynəlxalq jurnalda dərc edilib

Riyaziyyat və Mexanika İnstitutunun “Riyazi analiz” şöbəsinin müdiri,  AMEA -nın müxbir üzvü, professor Vaqif Quliyevin 1-ci Azərbaycan-Rusiya birgə beynəlxalq qrant müsabiqəsi çərçivəsində məqaləsi çap olunub. Məqalə “Clarivate Analytics” beynəlxalq bazasında referatlaşdırılmış “Mathematica Slovaca”

(https://www.degruyter.com/view/journals/ms/ms-overview.xml) 0.654 yüksək impakt faktorlu jurnalda dərc edilib.

Bn maksimal və Bn sinqulyar inteqral opratorların dəyişən dərəcəli Lebeq fəzalarında məhdudluğu” adlı məqalədə Laplas-Bessel diferensial operatorun doğurduğu Bn  maksimal və Bn  sinqulyar inteqral opratorların dəyişən dərəcəli Lebeq fəzalarında məhdudluğu isbat edilmişdir.

Məqaləni oxumaq üçün linkə keçid edin:

https://www.degruyter.com/view/journals/ms/70/4/article-p893.xml

© Bütün hüquqlar qorunur. Xəbərlərdən istifadə edərkən www.imm.az saytına istinad zəruridir.

AMEA-da 2020-ci il üçün doktoranturaya və dissertanturaya qəbul elan edilir

Azərbaycan Milli Elmlər Akademiyası Azərbaycan Respublikası Nazirlər Kabinetinin 25 avqust 2020-ci il tarixli, 493s nömrəli sərəncamı ilə təsdiq olunmuş Azərbaycan Respublikasının ali təhsil müəssisələrinin, elmi təşkilatların 2020-ci il üçün doktorant və dissertant hazırlığı üzrə qəbul planına əsasən 2020-ci il üçün fəlsəfə doktoru və elmlər doktoru hazırlığı üzrə doktoranturaya və dissertanturaya qəbul elan edir.

Fəlsəfə doktoru və elmlər doktoru hazırlığı üzrə doktoranturaya və dissertanturaya sənədlər 14 sentyabr – 7 oktyabr 2020-ci il tarixlərində hər gün (şənbə, bazar və bayram günləri istisna olmaqla) saat 10:00-dan 17:00-dək qəbul ediləcək.

Fəlsəfə doktoru proqramı üzrə doktoranturaya ali təhsil pilləsinin magistratura səviyyəsini bitirən (magistr dissertasiyasını müdafiə edən), yaxud təhsili ona bərabər tutulan (tibbi təhsildə həkim-mütəxəssis) Azərbaycan Respublikasının vətəndaşları müsabiqə əsasında qəbul olunurlar.

Fəlsəfə doktoru proqramı üzrə doktoranturaya qəbul olmaq istəyən şəxslər xarici dildən ali təhsil pilləsinin magistratura səviyyəsi üçün qüvvədə olan tədris proqramları həcmində (rus dili istisna olmaqla, seçim sərbəst və ya ixtisasa uyğun olmalıdır) Azərbaycan Respublikasının Dövlət İmtahan Mərkəzində imtahan verməlidirlər.

Xarici dildən imtahanda keçid balını toplayan şəxslər fəlsəfədən imtahana buraxılırlar.

Fəlsəfədən məqbul alan şəxslər ixtisas imtahanına buraxılırlar.

Doktoranturaya qəbul üçün aşağıdakı sənədlər AMEA-nın müvafiq elmi müəssisələrinə (elmi müəssisələrin ünvanını AMEA-nın www.science.az saytından əldə etmək olar) təqdim olunmalıdır:

– elmi müəssisənin direktorunun adına ərizə;

– kadrların şəxsi-qeydiyyat vərəqi;

– tərcümeyi-hal;

– 2 ədəd fotoşəkil (3×4 sm ölçüdə);

– iş stajı olanlar üçün əmək kitabçasından çıxarış;

– iş yerindən xasiyyətnamə;

– çap olunmuş elmi işlərin siyahısı və ya seçilmiş ixtisas üzrə referat;

– ali təhsil müəssisəsini bitirmək haqqında diplomun müvafiq qaydada təsdiq edilmiş surəti (xarici ölkələrdə təhsil almış Azərbaycan Respublikasının vətəndaşları üçün təhsil haqqında sənədlərin tanınması haqqında şəhadətnamə);

– xarici dil bilikləri üzrə beynəlxalq sertifikat (IELTS, TOEFL, TestDaf, DALF) əgər  varsa);

– şəxsiyyəti təsdiq edən sənədin surəti.

Xarici dil üzrə qüvvədə olan beynəlxalq dil sertifikatına (IELTS, TOEFL, TestDaf, DALF) malik olanlar xarici dil üzrə qəbul imtahanından azad olunurlar. Beynəlxalq dil sertifikatının imtahan nəticələrinin ekvivalentliyi AMEA və Təhsil Nazirliyi ilə razılaşdırılmaqla Dövlət İmtahan Mərkəzi tərəfindən müəyyənləşdiriləcək.

Elmlər doktoru proqramı üzrə doktoranturaya seçdikləri sahədə elmi və ya elmi-pedaqoji nailiyyəti olan, fundamental tədqiqatları yüksək səviyyədə aparmağı bacaran və fəlsəfə doktoru (elmlər namizədi) elmi dərəcəsi olan Azərbaycan Respublikasının vətəndaşları qəbul edilirlər.

Doktoranturaya qəbul üçün aşağıdakı sənədlər AMEA-nın elmi müəssisələrinə təqdim olunmalıdır:

– ərizə (doktoranturanın fəaliyyət göstərdiyi müəssisənin və yaxud təşkilatın rəhbərinin adına);

– kadrların şəxsi-qeydiyyat vərəqi;

– tərcümeyi-hal;

– 2 ədəd fotoşəkil (3×4 sm ölçüdə);

– iş yerindən xasiyyətnamə;

– əmək kitabçasından çıxarış;

– çap olunmuş elmi işlərin siyahısı;

– fəlsəfə doktoru (elmlər namizədi) elmi dərəcəsi diplomunun müvafiq qaydada təsdiq edilmiş surəti;

– ali təhsil müəssisəsini bitirmək haqqında diplomun müvafiq qaydada təsdiq edilmiş surəti (xarici ölkələrdə təhsil almış Azərbaycan Respublikasının vətəndaşları üçün təhsil haqqında sənədlərin tanınması haqqında şəhadətnamə);

– şəxsiyyəti təsdiq edən sənədin surəti.

Dissertantlıq yolu ilə fəlsəfə doktoru elmi dərəcəsi almaq üçün dissertanturaya ali təhsil pilləsinin magistratura səviyyəsini bitirən (magistr dissertasiyasını müdafiə edən), yaxud təhsili ona bərabər tutulan (tibbi təhsildə həkim-mütəxəssis), müvafiq tədqiqat sahəsində  müəyyən müvəffəqiyyətləri olan və əsas iş yeri ali təhsil müəssisəsi, elmi müəssisə və təşkilat olan, azı iki il elmi və elmi-pedaqoji iş stajına malik elmi və elmi-pedaqoji kadrlar sənəd təqdim edə bilərlər.

Dissertantlıq yolu ilə təhsil müddətini başa vuran şəxslər eyni ixtisas üzrə təkrar dissertant ola bilməzlər.

Doktoranturada tam təhsil müddətini başa vurmuş şəxslər eyni ixtisas üzrə dissertantlıq yolu ilə təhsil ala bilməzlər.

Dissertantlıq yolu ilə fəlsəfə doktoru elmi dərəcəsi almaq istəyən şəxslər xarici dildən ali təhsil pilləsinin magistratura səviyyəsi üçün qüvvədə olan tədris proqramları həcmində (rus dili istisna olmaqla, seçim sərbəst və ya ixtisasa uyğun olmalıdır) Azərbaycan Respublikasının Dövlət İmtahan Mərkəzində imtahan verməlidirlər.

Fəlsəfə doktoru elmi dərəcəsi almaq üçün dissertanturaya qəbulla bağlı aşağıdakı sənədlər AMEA-nın müvafiq elmi müəssisəsinə təqdim olunmalıdır:

– ərizə (dissertantura təhsilini həyata keçirən müəssisənin və yaxud təşkilatın rəhbərinin adına);

– kadrların şəxsi-qeydiyyat vərəqi;

– tərcümeyi-hal;

– 2 ədəd fotoşəkil (3×4 sm ölçüdə);

– iş yerindən xasiyyətnamə;

– əmək kitabçasından çıxarış;

– çap olunmuş elmi işlərin siyahısı və ya seçilmiş ixtisas üzrə referat (fəlsəfə doktoru hazırlığı üzrə);

– ali təhsil müəssisəsini bitirmək haqqında diplomun müvafiq qaydada təsdiq edilmiş surəti (xarici ölkələrdə təhsil almış Azərbaycan Respublikasının vətəndaşları üçün təhsil haqqında sənədlərin tanınması haqqında şəhadətnamə);

–  şəxsiyyəti təsdiq edən sənədin surəti.

Dissertantlıq yolu ilə elmlər doktoru elmi dərəcəsi almaq üçün fəlsəfə doktoru elmi dərəcəsinin olması  əsas şərtdir.

Elmlər doktoru elmi dərəcəsi almaq üçün dissertanturaya qəbul üçün aşağıdakı sənədlər AMEA-nın müvafiq elmi müəssisəsinə təqdim olunmalıdır:

– ərizə (dissertantura təhsilini həyata keçirən müəssisənin və yaxud təşkilatın rəhbərinin adına);

– kadrların şəxsi-qeydiyyat vərəqi;

– tərcümeyi-hal;

– 2 ədəd fotoşəkil (3×4 sm ölçüdə);

– iş yerindən xasiyyətnamə;

– əmək kitabçasından çıxarış;

– çap olunmuş elmi əsərlərin siyahısı (elmlər doktoru hazırlığı üzrə);

– fəlsəfə doktoru (elmlər namizədi) diplomunun müvafiq qaydada təsdiq edilmiş surəti;

– ali təhsil müəssisəsini bitirmək haqqında diplomun müvafiq qaydada təsdiq edilmiş surəti (xarici ölkələrdə təhsil almış Azərbaycan Respublikasının vətəndaşları üçün təhsil haqqında sənədlərin tanınması haqqında şəhadətnamə);

– şəxsiyyəti təsdiq edən sənədin surəti.

Əlavə məlumat üçün AMEA Rəyasət Heyətinin Elm və təhsil idarəsinin Doktorantura və dissertantura şöbəsinə müraciət etmək olar.

Əlaqə nömrələri: (+994 12) 539 30 60, 492 84 48

E-mail: eti@science.az

Qeyd: Fəlsəfə doktoru hazırlığı üzrə doktorantura və dissertanturaya sənəd verən iddiaçılar xarici dil imtahanında iştirak etmək üçün sənəd qəbulu bitdikdən sonra Dövlət İmtahan Mərkəzinin saytında şəxsi kabinet açaraq qeydiyyatdan keçməlidirlər.

© Mənbə: www.science.az

Doktoranturaya və dissertanturaya hazırlaşanların nəzərinə!

Azərbaycan Respublikasının qanunvericiliyinə görə, doktorantura ali təhsilin ən yüksək səviyyəsi, doktorluq elmi dərəcəsinin alınmasını həyata keçirən yüksək səviyyəli elmi kadr hazırlığı formasıdır və elmi kadrların hazırlanmasını, iхtisas və elmi dərəcələrin yüksəldilməsini təmin edir.

Nazirlər Kabinetinin 2010-cu il 1 iyul tarixli 129 nömrəli qərarı ilə təsdiq edilmiş “Doktoranturaların yaradılması və doktoranturaya qəbul Qaydaları”na və həmin qaydalarda dəyişiklik edilməsi barədə Nazirlər Kabinetinin 2019-cu il 13 noyabr tarixli 443 nömrəli qərarına əsasən, doktoranturaya qəbul olmaq istəyənlər xarici dildən (rus dili istisna olmaqla, seçim sərbəst və ya ixtisasa uyğun olmalıdır), fəlsəfədən və ixtisas fənnindən ali təhsil pilləsinin magistratura səviyyəsi üçün qüvvədə olan tədris proqramları həcmində qəbul imtahanları verirlər.

Xarici dil üzrə imtahan Dövlət İmtahan Mərkəzi (DİM) tərəfindən keçirilir. Xarici dil üzrə imtahanın məzmunu, vaxtı, imtahan nəticələrinin qiymətləndirilməsi qaydası və keçid balı Azərbaycan Milli Elmlər Akademiyası (AMEA) və Təhsil Nazirliyi ilə razılaşdırılmaqla DİM tərəfindən müəyyənləşdirilir.

Qəbul imtahanında xarici dillərə yiyələnmə səviyyəsinin müəyyənləşdirilməsi üzrə ümumavropa tövsiyə çərçivə sənədinin (CEFR) B2 səviyyəsinə və beynəlxalq dil imtahanlarının strukturuna müvafiq olaraq, namizədlərin xarici dillər üzrə oxu, dinləyib-anlama, yazı və danışıq bacarıqlarının, dildən kommunikativ məqsədlə istifadəetmə vərdişlərinin, lüğət ehtiyatına və qrammatik minimuma yiyələnmə səviyyəsinin yoxlanılıb qiymətləndirilməsi nəzərdə tutulur.

Xarici dil üzrə qüvvədə olan və CEFR-in B2 və ya daha yüksək səviyyəsinə müvafiq beynəlxalq dil sertifikatına (IELTS, TOEFL, TestDaF, DELF, DALF) malik olanlar xarici dil üzrə qəbul imtahanından azad olunurlar. Beynəlxalq dil sertifikatının imtahan nəticələrinin keçid balına ekvivalentliyi də AMEA və Təhsil Nazirliyi ilə razılaşdırılmaqla DİM tərəfindən müəyyənləşdirilir.

Dissertantlıq yolu ilə “fəlsəfə doktoru” elmi dərəcəsi almaq istəyən şəxslər də xarici dildən (rus dili istisna olmaqla, seçim sərbəst və ya ixtisasa uyğun olmalıdır) bu qaydada qəbul imtahanı verirlər.

Doktoranturaya və dissertanturaya hazırlaşanlar proqramları verilmiş linklərdən (Azərbaycanrus) yükləyib tanış ola bilərlər.

© Mənbə: www.science.az